البطمي يرد على الناس الذين يدعون سطوتهم وتسلطهم على زوجاتهم

شخلاها واحد صاحبي مزوج قاليا شوف شتي كاع دوك المزوجين لي كيبقاو يديرو فيها فحولة و كدا عرفو يا حاكماه المرا يا شاد معاها العصة من الوسط و كاع المزوجين العاديين عرفهم شادين العصى من الوسط مع المادام لا ضرر لا ضرار يساوي شوية هاكا و شوية هاكا باش تمشي الحياة .

و كاع دوك لي ممزوجينش و كيبقى يقولك أنا و أنا و راه مزال معرفتي دينربمي شكنسوا و الله بوها نجيبها لدار لا تفنفنات و الله بوها تننن و تنننن و تننن .. تسنا عليه يتزوج و تخرا عليه بضحك ..

بزاف كيقولو أنا فبلاصت جوني ديب كولي فلوس و كدا و كديات كوراه الحريم عندي جواري فدار و كدا و الله بوها منخلي شي وحدة تهز نيفها و لا توصلني لداك لمواصل ..

ناس سطحيين جدا كيحكمو على ما يطفو على السطح دون أنهم يعرفو تا حاجة من التفاصيل .. كيهضرهم الجهد و الأنا و قلة التجربة و كيهضرهم الخيال لواسع ديالهم حيت كيتخيلو راسهم حاكمين الأوضاع مع أي نتوا ..

بينما التفاصيل لي فيها الروابط تغيييب عنهم حيت عمرهم عاشو شي رابط حقيقي مع شي أنثى من غير مواتهم ..

مثلا كتشوف شي مرا بلارة مع شي كلوشار كيعنفها و كيدفل عليها و مكتفهم والو كتقول كيفاش صابرة عليه هاد ختنا و مغتلقاش جواب حيت الرابط لي شادو معاها عارفاه غير هي سواء كان ميول معين نحو العنف سواء رابط اجتماعي معين سواء كان حب قوي و أعمى ..

تقدر متفهموش أنا منفهموش لاخر ميفهموش لكن هوما لي فالوضعية فاهمين ..

البلان داير فحال شي خدمة معدباك و صاليرها قليل و لباطرون كيحرث علك لكن متقدرش تخرج منها حيت لخرجتي منها غيضربوك الحيوط ..

تقدر تفهم كولشي إلا التركيبة النفسية ديال عباد الله و علم النفس بكروو و يالا كيدير محاولات كيصدقو و كيفشلو و كيحاول يعرفنا على انفسنا و على الأخرين و مع ذلك هو علك غير شامل و ميمكنش يدير كاطالوك فيه كاع اضطرابات النفس و فيه كاع أشكال التكوين النفسي لكاع أنواع البشر ..

هاد الاختلاف بالبنية النفسية كيخلي من الصعب أن شي جوج فالعالم يتوالمو و أكيييد أكيييد أن كل واحد شاد عمود من اعمدة الخيمة باش مطيحش و أن كل واحد من جيهتو صابر شوية على الأخر باش يكملو .. و شي خطرات كيتكب كولشي على طرف واحد ..

العلاقات معقدة بزاف داكشي علاش مخصكش تصدر الاحكام عن بعد و مخصكش تلوم هدا على هدا .. كولا و عندو ديفواتو و كولا غيشكي من حاجة ..

يقدر يبان لك نتا مثلا زوج فلانة عنيف جدا و كتقول علاش صابرة معاه بينما هي لي عارفة علاش و ربما ورى داك العنف كاين إنسان كيبغيها بزاف و دار على ودها شي حوايج نتا غير سامع بيهم و داكشي لي نتا لي غير سامع بيه هو لي كيشكل الرابط الحقيقي ..

تالشي خطرة داك الرابط كيعيا و صافي .. كيتم الفراق .

الفراق لي بدورو كيجيك نتا ساهل حيت نتا انسان عمرو جرب المرار ديالو حيت عمرو عاش شي علاقة ناضجة ..

بينما هو فحقيقة الأمر جد عسير و صعيب بزاف و مدمر ..

تقدر يجي عندك صاحبك يقولك فلانة راه دارت ليا و دارت ليا و دارت و نتا كتقولو وايلي دارت معاك هادشي كولو و باقي معاها تفارق مع الخرى ..

واش كظن أنه هو مفكرش فالفراق ؟

اكيد لكن صعيب عليه .. حيت كاين أمور اخرى كيدكرهم ليها من غير داكشي لخايب لي دارت ليه ..

تقدر تجي عندك صاحبتك كتبكي و كتخنن حيت لقات راجلها و لا صاحبها كيخونها و لا حصلات عندو شي ميساج أو شي حاجة و غتقولي ليها وييلي اختي تفارقي معاه ناااو ...

واش كظني لو كان الأمر سهل و بسيط عليها كانت غتعطل ؟ طبعا لا ..

و فأخر المطاف غتلقايها مسامحة ليه و رجعات ليه ..

مكنقولش هادشي باش نقول صافي نطبعو مع العلاقات الطوكسيك أو الخيانة أو صبري عليه و لا صبر عليها .. لا .

كنحاول نقول أن أي علاقة بانت لك نتا فشكل لي عايشينها عارفينها علاش فشكل فاهمين علاش فشكل و الحل لي نتا كتفكر فيه فكرووو فيه و مخدامش لأسباب معينة ..

انا لا شكى عليا شي حد من شي علاقة طوكسيك كنقولو تفارق معاها غير باش ميبقاش فارع ليا كري ..

أما عارفو مغاديش يتفارق معاها .. و هو لي فاهم علاش ..

بعد المرات بنادم كيحسب ليه غير هو لي فاهم دنيا حيت عمرو غطس فعلاقة و عمرو كان جدي فشي علاقة و كيحسب ليه داك المصاحبة ديال فرانش كيس و البرتوش ديال ليسي و كدا راه هادوك هوما العلاقات زعما ..

مزال ما شتي والو أحنيني ..

و لي واخدها تحدي زعما و روجولة و فحولة و داكشي لي كنا كنطيحو بيه لبنات فألفين و عشرة ..

غير تكالما أخاي ديالي و طلب الله طيح مع شي نقرة زينة قلبها بيض و حاطة الراس علك و مربية عند واليدين زينين شي حاجة أخرى راه و الله الططبون مك تتخرى الشمع ..ٍ

نشرت يوم 29 ابريل 2022