البطمي يكتب حول تأثير الفايسبوك على فكر الانسان وسلوكه تجاه الآخر

جاب الله كاين الله و كاين مارك زكلبرد واخا تاهو إقصائي شوية لكن على الأقل عطانا فضاء كنتناقشو فيه واخا غالب النقاشات بزانطية و لا تسمن و لا تغني من جوع لكن بنادم بعدة عندو منصة كيقول فيها شي حاجة .. كيضحك .. كيضارب .. كيهضر .. كيتوتز .. كيشوف لعرى .. كيشوف ما يرضي الله .. كيعطي رأيو .. كيقرا أراء الناس ..

شحال هذا قبل فيسبوك مكانتش عندنا هاد القدرة واخا كانو ديبلاطفورم فحال المنتديات و البالتولك .. لكن داكشي مكانش اكسيسبل بسهولة فحال لفيس و مكانش فيه ريتش كبير .. كان خصك تقلب بينما دابا كولشي قدامك بمجرد تحل لفيسبوك ..

و هاد البلان دشحال هذا سبب لينا مشكل كبير لي هو كان كيحسب لينا كولشي فحالنا و كولشي عندو نفس التفكير ديالنا مع اختلافات بساط ..

حيت كنتي كتعمر مع صحابك و مع ولاد قيسمك و لاد حومتك و هاد الأشخاص غالبا تسعين فالمية كايشبهو لك شوية و الأسرار مكتشاركش و الأراء المخفية كتبقى مخفية

لكن مع الفيسبوك كولشي ولا كيعرف كولشي .. واحد ساكن فالهونولو ولا قادر يقرى ليا و نقرى ليه و يعرفني و نعرفو و يأثر فيا و نأثر فيه ..

و بدينا كنشوفو فكر جديد و أراء جديدة و كنشوفو أمور كان كيحسب لينا مكايناش و كنعرفو ناس كان كيحسب لينا مكاينينش ..

هاد المسألة كتأدي بيك لجوج أمور .. يا إما كتشدك صدمة تقافية وجودية و كتولي متعصب و إقصائي و كدافع على شخصك القديم الأصلي لي مكان عارف والو ..

يا كتبدل و كتولي عكس شخصك القديم و كتبنى فكر جديد و رؤى أخرى ..

يا كتنفاتح و كتوازن بين شخصك القديم كيفما كان و بين الفكر الجديد و الرئى الجديدة و كتختار تقبل دون تعصب و كتماها مع الكل ..

و كتعرف أخيرا أن النمودج ديالك نتا و صحابك ماشي هو النمودج الوحيد و ماشي هي الطبعة لوحيدة لي متوفرة فالمجتمع بل المجتمع مخلط و عااامر بالاختلاف جداااا ..

يلا كنتي هروي كتعرف غير الهروي و القائمة ديالك فيها غير ولاد مدينتك و حومتك و لي كيشاركوك نفس التفكير نفس العقلية نفس لون تقاشر .. كتبقى هاكاك متعرف والو تا شي نهار كتلاقا مع شي حد مطلعها على المعراج ديال الرسول و كتقول شاوا هذا .. مالو هذا .. شكون هذا .. كيفاش .. وقتاش .. علاش .. كتصدم مكتفهمش كيفاش بنادم تجرأ و كتسبو و لا كتبلوكيه و كتبقى هاكاك محاط بالهروي داير لراسك حدود و حاط قدامك سد و الاف الخوط الحمراء غير فهادشي .. اما السبان و تخصار الهضرة و تسيفيط النبوبا لدريات هاديك عادي عادي مافيها شي ..

أما يلا كنتي انسان عزيز علك شوية ديال المعرفة و عندك عقل زوين و مرن و كيتماشا مع الوقت و عندو قابلية دأنه يشوف اي حاجة و يستنتج و يدوز .. كتكون عندك لائحة فيها كولشي و عندك قابلية تكون صاحب كولشي و كتناقش مع كولشي و أفكارك راهم أفكارك و مبادئك راهم ديالك تاحد ميقدر يبدلهم لك من غير يلا نتا مابقاوش خدامين لك و بدلتيهم ..

كتعرف أن المجتمع فيه خالوطة جالوطة و أنك لبد مخصك تقبل الخلوطة و مخصش تكون عندك ارادة فأنك ترجع كولشي فحالك بل عندك حق الرد و النقد و الكوميدية و ابداء الرأي اما فرض شي حاجة معندكش فيه الحق ..

و الرد كيكون رد و نتقاد و محاولة لنقاش ماشي سبان و ماشي معيور و ماشي شخصنة و ما تاحاجة ..

مع أني اتفق على سبان شي مرات حيت كاين شي وحدين لا يستحقون تناقشهم خصك تسبو ديريكت .

نشر يوم 21 أبريل 2022