مفارقة الإندماج : أفارقة جنوب الصحراء و مغاربة أوروبا
معاجبينكش المهاجرين الافارقة الدينديماهم لي معمرين البلاد.. هذا من حقك ... تا "حنا" الأوروبيين معاجبيناش المهاجرين المغاربة لي عمروا علينا الدنيا ! كينعسوا فالكراطن، وكيسعاو فالميطروات، وكيخراو فلاكار، وكيسرقوا فالترانات .. وكيحزقوا فالمراكز ديال الايواء لي فيها الشوفاج والماكلة سخونة فابور ..والمساهمة الوحيدة لي كيساهموا فيها فالعالم الغربي، هي الاحتباس الحراري واطلاق الغازات السامة ... ونهار الجمعة كتلقاهم حدا شي مركز اسلامي كيطلبوا من الموسليمين يتشاعونوا معانا ... وطبعا كلشي فالمغرب كيطلب ربي يسهل عليهم فالغربة، ويلحقنا بيهم تائبين طائعين ...
أما هداك المهاجر الأكحل بوبري فالمغرب لي محال واش تلقا أصلا شي واحد فغامبيا كيدعي ربي يسهل عليه ..هداك لا يستحق أي تعاطف بالمطلق ، واخا يكون هارب من الحرب ولا من الفقر ولا من الجوع، ولا من الميليشيات ولا من الطوفان... ولا قاطع صحراء كالاهاري بنص قرعة ديال سيدي حرازم صغيرة ، باش يجي يشوف الفردوس الأعلى ديال محطة ولاد زيان ..هذاك ماشي سوقنا فيه أشنو جاي يدير عندنا، أصلا راه حنا مقودة علينا اكثر منه ... حيت حنا سلالة هولاكوا كاع مكنعقلوا فين جات باماكوا ... ثانيا وبلا منطولو فهاد القصص التافهة ..كون كنا حنا هوما أوروبا كون راه مبابي دابا كيبيع ميكا فغينيا ... وجورج وايا بلومبي فداكار ... وحكيم زياش كيحضي فشي كولفازير فليبيا ..
وأخيرا .. تحويلات المهاجرين المغاربة هاد العام حطمات الرقم القياسي لي فات عشرة مليار ديال الدونار، وهو الرقم الذي أنقذ اقتصاد المغرب من الهاوية،وأنقذ معاه احتياطي العملة الصعبة ديال سيدي عبد اللطيف الجواهري حفظه الله ونصره على جميع انواع العجز التجاري ...
يعني باختصار البلاد لي كتعيش من الهجرة وفلوس والبنات والدراري لي الغربة .. خصها تكون على الأقل كتقدر ظروف أي واحد لاحتو الظروف يوقف على كمارتنا، منحملوهش كاع .. . وكما قال الشاعر توكو ايكامبي .. يلا شديتي فلوس الدراري .. غا بلا متقول لينا حذاري !!!
ما هو رد فعلك؟
