البطمي : المغاربة في حاجة إلى إعادة التربية و التأهيل
هو صراحة أخنوش فاش قال أو ربما أشار على أن المغاربة خص تعاود ليهم التربية راه مكدبش
غير حنا هاد الكلمة كناخدوها على خاطرنا مع أنها فالأصل كلمة إيجابية إعادة التربية و التكوين الإجتماعي راه شي حاجة خصنا نطالبو بيها حنا قبل ميطالب بيها شي مسؤول
هي كتجي فحال شي معيورة حيت كتعني فحالا نتا ممربيش و خصك تعاود تربا و حيت الكلمة فالقاموس الاجتماعي هي سبة و عقاب
لكن شنو العقاب فأني نحاول نصلح فيك مكامن الخلل و نردك راجل من بعد ما عبث بيك النظام التعليمي و التهميش و المفاهيم المجتمعية و الدينية البالية ؟
راه المغرب سنين و هو كيعاود ينتج فراسو و كل جيل كيجي كيطلع أخرا و أمر من الجيل السابق
و السبب هو أننا معدناش النظر فنظام التربية و التكوين و معدناش النظر فالمفاهيم التربوية و الطرق لبيداغوجية لي كنطبقو هادشي يلا كنا فعلا كنطبقو شي حاجة
فمثلا اليابان و المواطن اليباني هو نتاج واحد النظام تربوي معين مستمد أولا من التقافة و التقاليد لي طبعا كناخدو منها المفيد و نلوحو التخربيق و مستمد من الرغبة فالتغيير و التخطيط للمستقبل
هاد النظام هو نتاج فكر طبقة متقفة و من تطبيق المؤسسات الحكومية على رأسها مؤسسات التعليم و المؤسسات الموازية
واش ليبان كانو هاكا ؟
لا طبعا غير من ورى الحرب العالمية التانية عاد عاودو ليهم التربية
واش أوروبا كانت هاكا ؟
لا طبعا تاهي عاودات التربية عدة مرات و دابا راه ولاو كيخرجو على السطر تاني و خصهم يفكرو يعاودو التربية خاصة فرنسا
إذن الفكرة تاع خصنا نعاودو ليكم التربية هي فكرة فحد داتها فكرة جد إيجابية
الصياغة ناقصة لكن الفكرة ممتازة
حيت فعلا مجتمعنا بكل صراحة خصو يتعاود فالتربية لأننا و للأسف مزال عايشين فزريبة و مزال كنتجو حيونات ناطقة يوميا
مزال الإنسان المغربي متوحش و غير مواكب للعصر و مزال يحمل ألاف الأفكار الرجعية و البدائية و مزال مكيفرقش بين الحق و الواجب و مزال مفاهمش شنو هو التعايش و مزال حتى يلا بغى يهضر على حقو مكيعرفش يهضر نهائيا
فإلى كانت النية هي نعاودو المغرب باش نتجو جيل أكثر حداثة و تسامح و وعي فهذا هو لي بغينا و أنا شخصيا مستعد نعاود نتربا
ما هو رد فعلك؟
