البطمي ينتقد خطاب اللحايا وياسين العامري نموذجا

متبع ياسين لعامري و نتا فأوج الشباب ديالك راك غير كتقتق فالخلايا ديال الدماغ و الجهد .. و ماشي غير ياسين لعامري كنعطي بيه مثال غير حيت هو لي طوندونس حاليا عندنا ..

أما أي فقيه مخصكش تبعو نتا مسلم مقاليك حد سير لحد و لا ناقشك فدينك الله يسهل لك صلي و صوم و زكي و دير لحية نتا كاع و لبس الفوقية ..

لكن متعتاكفش على الاستماع للحايا نصيحة أخوية الخطاب ديال أي لحية فالعالم هو خطاب ترحيبي شي مرات لكن غالبا ترهيبي القوة ديالهم كتجلى فأنهم عبر الخطاب كيخليوك تحس بالدنب و تأنيب الضمير و كتبقى تشوف راسك عامر خطيئة تا كولشي كيكحال فوجهك و كتبقى تحصر و تعدب فراسك بينما نتا فالحقيقة مداير والو من غير شي حوyaات و شي تكفيتات و شوية د النميمة و غشيتي فالامتحان و كدا ماشي شي حاااااجة كبيرة و لي قاليك كبيرة قولو سير ينعل رببك واش نتا زعما منزه عمرك حوwiتي و لا كفتي على جارتكم و لا تفرجتي فالبورنو .. سير اوا تتتقود ..

هوما عارفين أن الشباب كولو خطئية و كولو كيحwi و يتفرج فالبورنو و يكفت و يدير الدنوب و فاش كيشدك شي فيديو بالهضرة الحلوة و شي ايات و شي احاديث كيحكمك و كتخلي دماغك يحكمك و كتحس براسك فبيت النار كتنهار شخلاها حليوة ..

كياخد من رببك كاع طاقتك الشبابية و روحك الزوينة لي واخا كتخطأ عادي نتا شاب و كاع الشباب كيخطؤو و راه لا يمكن شي حد يقولك انا منزه .

كتبقى تبان لك الحياة هي صلاة و صوم و غض بصر و لباس لعيالات و شي أمور تافهمة لي ميمكنش و نتا شاب مقبل على الحياة تفكر فيهم كتسناك خدمة و قرايا و تكوين أسرة و تحقيق أحلام ..

لحية عمرو ينصحك فالخدمة و التجارة و يقولك وجد راسك باش تحقق احلامك . 

هو مريح شاد ميكرو و كيدخل لعاقة بالهضرة الله يسهل ليه نتا عوض تبقى تسمع فيه كيسد ليك كاع بيبان الجنة و الحياة فوجهك نوض اخويا لعب شي ماتش و لا سير لاصال و قرا و خدم و لا بغيتي تبقى زوين مع ربي ساهلة صلي و صوم و زكي و الأهم دير الخير و مضلمش و لا سهل علك الله عطي و عاون و قول كلام زوين و صالح بين الناس و مضحكش على البنات يلا كنتي طياح الاسلام راه دين معملات و اخلاق اما العبادات ساااهلين .. ارانا الصح ديال بصح .

هادشي قلال اللحايا لي غيقولوه لك هوما فقط غيمشيو لهوامش تاع الموسيقى حرام و تحياد الحواجب و مديريش الريحة اختي فالله شي حوايج باااانااااال ..

أما الاخلاق لا .. الاخلاق عندو هو هي تصمك ختك و تفرض الحجاب على مك و متهضر مع بنات قيسمك .. لمهم داكشي لي عندو علاقة بالساكوفاح شي حاجة اخرى هانية ..

واش لحيا حاليا .. غيجمع الشباب فشي جلسة في ما يرضي الله و يسمي الله و ينصح الشباب فالعملة الرقمية و لا يشرح ليهم شوية أو ينصحهم بالتجارة أو يوجههم لشي ضومين زوين بما أن نصيحتو مقبولة و دورو هو تنوير الشباب المسلم ؟

طبعا لا .. أكثر ما يمكن انه يدير هو يقولك واش البيتكوين حلال ولا حرام ..

هاد لحايا لي كيسميوهم علماء فحالا زعما حفظ الاحاديث و نقل الأيات و حفظ التفاسير علم عنداك يسحب ليك الدور ديالهم زعما هو فقط يجي يبقى يحلل و يحرم .. التقات ديال المجتمع لو كانو فعلا تقات راه كيحدثثو فأمور الدنيا قبل الدين و كينصحو الشباب ماشي فدين و إنما فالدنيا أولا ..

ما الغرض من أنك تنتج مليون شاب خايف من جهنام و معقد من الشعر و الصايا ديال البنات و كيعرف يصلي و هو خاوي ملداخل و عاطل عن العمل و كل جهدو و تركيزو فالأخرة و فملابس العيالات ؟

لحيا فقط غيدمرك و غيحرم علك الرسم يلا كنتي كتعشقو و غيحرم علك الخياطة يلا كنتي محب لتصميم الازياء و غيحرم علك الثمتيل يلا كنتي باغي دير المعهد بل يقدر يحرم علك الرياضيات و الفلك و الفلسفة و يقوليك علوم فارغة و العلم عند الله هو الشريعة ..

ضيع وقتك فشي وتائقي كيهضر على البيئة و لا على الأزمة الأوكرانية الروسية و مضيعش وقتك كتسمع لشي لحية كيعاود راسو من نهار شد الميكرو ..

نشر بتاريخ 19أبريل 2022