خطر الٱنقراض يهدد اللغات الأم الدارجة المغربية نموذجا
كنشوف بلي اللغة الدارجة القديمة في طور الانقراض ، غادة و كتضيع منها بعض الكلمات و الجمل و كتعوضها كلمات اخرى ديال جيل آخر ..
من بعد مكنتي كتسمع بزاف : سلام لباس . بخير..
لي باقي كقولوها غي اجيال قديمة قليلة.
دبا اغلب الاجيال كتسمع غي : واش الساط صافا..
واش اعشيري هاني ليا ...
مع الوقت غيمشي ذوك الاجيال و مغتبقاش تسمع..
فين هي الهضرة ديال زمان عبد رحمان المجدوب و ديال حديدان و ناس القدام..
تقريبا انقرضت بقاو كستعملوها غي رواد الزجل المغربي ..
من هنا لشي عشرات السنيين فهاذ الرقعة الجغرافية كنظن غيحدث تغيير متجدر فاللغة الدارجة حيث ماشي بذاك العمق هي و تلقى مصير بزاف د اللغات القومية و اللهجات لي انقارضو ولا على وشك الافول..
فحال لغة الشيميهوفي لي كانت هي اللغة الاساس المتداولة فالرقعة د USE تقريبا شي 12 قرن دبا.
مع الابادة و الميز و التهجين و التطهير العرقي حاليا قالت منظمة اليونسكو ان ثلاثة اشخاص لي باقين حاليا كهضرو بيها ..
و اللغة القوطية لي لي كانت عندها حروف خاصة حاليا انقرضت بشكل نهائي..
و لغات اخرين انقرضو غي حديثا فحال اللهجة الكرومترية من اللغة اسكتلندية و لغة النوشتالت و شحال من لغة و لهجة اخرى..
يا ايما بسباب الميز العنصري و تهميش الاقليات ، يا اما بسباب عجزها اللغوي و التركيبي فمجاراة التطور البشري يعني كتكون صالحة فقط لشي حقبة زمنة و المفردات و الكلمات عندها عقيمة ..
و حاليا اليونيسكو كتحاول اعادة احياء بعض اللغات و كتحرص على ذوك الناطقين الاواخر بها باش يدرسوها و يخيلو قواعدها للناس المهتمين باش ميموتش التنوع اللغوي .و حمايةً للتراث اللغوي الإنساني
صحيح ان بزاف د الكلمات الدارجة هي عربية و العربية لغة عمييقة و لغة ولود شبعانة مرادفات و عندها لكل مقام مقال ...
لكن كتبقى الدرجة مجرد بركة تروى بنهر ينبع من بحر اللغة الام لي هي العربية الفصحى و هاذ البركة قابلة للتبخر مع مرور الوقت..
حتا امازغية يمكن مرجح تنقارض مي خاصها وقت بزااف..
كفما كلاحظو ان اغلب الامازيغ سوى ريافة او سوس كيهاجرو لمدن اقتصادية باش يخدمو و طبيعة الخدمة كتحتم عليهوم يهضرو بالدارجة بزاف . و فاش كولدو كستعملو العربية بزاف و الشباب و الاطفال د هاذ الجيل اغلبهوم كستعمل الدارجة و معندوش دراية كبيرة بالامازغية يقدر يسمعها يفهمها مي باش يهضر بيها تقدر تجيه صعيبة...
خصوصا ان الامازغية مكتدرسش بشكل رسمي فالمدارس ، فالطفل فالمدرسة خاصو يهضر بالعربية و مع صحابو كذالك و اغلب احيان و سط الدار . هاذا الى كانو الاباء بزوج امازيغ . اما الى كان واحد فيهوم ماشي امازيغي ضروري غيتواصل مع الطرف الاخر وسط الدار بالعربية و حتا الدراري..
و تبقى حتى ذوب الامازيغية و الدارجة هنا و فتونس و الدزاير
اما في (النيجر ؛ مالي ؛ بوركينافاسو ؛ مورتانيا ؛ و مصر فواحة سيوة) الامازغية على وشك الانقراض اقلية لي كهضرو بها مقارنة بعدد المثحدثين بيها فالمغرب و الدزاير..
اما ذوك الغوانش ديال جزر الكناري قضى عليهم الاستعمار الاسباني و كنت سمعت فأمودو انهم رجعو كدرسوها فمدارس خاصة ربما...
خلاصة القول خاص شي قارورة د النتروجين و نجمدو شي واحد عندو فضول و من بعد شي الف سنة على الاكثر نفيقوه و يشوف اش وقع فهاذ الرقعة ماشي غي على مستوى اللغة
ذاك الشي د اصحاب الكهف و سادسهم كلبهم .
ما هو رد فعلك؟
