لماذا ننجذب لشخص معين دون الآخر ؟

"اربع انواع من النساء في للاوعي الرجل"

(المقال محتاج شوية الدماغ)

- علاش انت ك دري كتنجذب لواحد النوع معين ديال البنات؟
- و انتِ كبنت كتنجذبي لواحد النوع معين ديال الدراري؟

[الأنيما و الأنيموس]

هاد جوج مفاهيم تصاغو من قبل عالم النفس كارل يونغ، بحيث حسب يونج هاد الأنيما و الأنيموس هما المسؤولين على عملية الانجذاب و الحب بين المرأة والرجل.

الأنيما كتعني هي مجموع الصور و الانطباعات الانثوية فاللاوعي ديال الرجل.
 اما الأنيموس فكتعني مجموع الصور و الانطباعات الذكورية فاللاوعي ديال المرأة.

يعني انت كرجل عندك فاللاوعي ديالك واحد المجموعة ديال الصفات و الانطباعات الانثوية على كيفاش المرأة خاصها تكون.
و كذلك انتِ كمرأة عندك فاللاوعي ديالك واحد المجموعة ديال الصفات الذكورية على كيفاش الرجل خاصو يكون.
–··· –·––   –·–– ––– ··– ··· ··· · ··–·   –··· ·–· ·– ···· ·· –– ··   

دابا غانطرحو سؤال!  كيفاش كيتم التشكيل الانيما عند الرجل و كيفاش كيتم تشكيل الأنيموس عند المرأة؟

حسب يونغ الأنيما كتشكل عند الرجل من خلال جميع التفاعلات ديالو مع الاناث، ابتداءا من الام و الاخوات و الاناث الاخريات فالمدرسة و ما الى ذلك... و لكن الجزء من الاكبر من الأنيما كيتشكل من عند الام، حيث هي لي كايكون عندها تأثير كبير عليه.

نفس الشي مع الأنيموس عند المرأة، بحيث هاد الاخير كيتشكل من مجموع التفاعلات ديال المرأة مع الذكور.

–··· –·––   –·–– ––– ··– ··· ··· · ··–·   –··· ·–· ·– ···· ·· –– ··   

يونج وصف هاد الأنيما و الأنيموس ب "صور افتراضية تكتسب شكلا" و حيث هاد جوج مفاهيم كاينين فاللاوعي و مخفيين، الطريقة الوحيدة باش كايبانو هي عن الطريق الاسقاط، بمعنى الرجل كايدير إسقاط للأنيما ديالو على المرأة، و الانثى كادير إسقاط للأنيموس ديالها الرجل. 

انا غانعطي مثال غالبا فايت طرا لينا كاملين.

معمرك كنتي غادي فالشارع او فشي بلاصة و بانت ليك شي بنت و فاللحظة اللولة لي  شفتيها، حسيتي براسك بحالا كتعرفها من هادي شحال و حسيتي بحالا فايتلك شفتيها من قبل، مع العلم انك اول مرة كانشوفها.(و من الغرائب و العجائب ديال هادشي هي انه داك البنت كاتشوفها غا مرة و مكتزيدش تعاود تشوفها ههههه)

او أنتِ كبنت فايتلك شفتي شي دري و عجبك من اللحظة الأولى و حسيتي بواحد الانجذاب غير طبيعي تجاهو؟ 

فبعض الدول و منها مصر و سوريا كيسميو هاد الشعور "الكيميا" و كاين لي كيسميه بداك التخربيقة ديال "الحب من اول نظرة" ههههه 

–··· –·––   –·–– ––– ··– ··· ··· · ··–·   –··· ·–· ·– ···· ·· –– ··   

شي لي كيطرا هنا ماشي حب للطرف الآخر، و انما فقط انت كرجل داك الصور لي عندك فاللاوعي ديالك على الانثى درتي ليهوم إسقاط على داك البنت و بالتالي الأنيما ديالك تجسدت فيها، شي لي خلاك تحس انك بحالا كاتعرفها من قبل. عاود قرا هاد الجملة باش تفهم كثار.    "صور افتراضية تكتسب شكلا"

ملي سالينا من هادشي، غادي نشرحو شناهما هاد اربع انواع من النساء لي كاين فاللاوعي ديال الرجل او اربع مراحل لتطور الأنيما.

–··· –·––   –·–– ––– ··– ··· ··· · ··–·   –··· ·–· ·– ···· ·· –– ··   

✓-مراحل تطور الأنيما 

.
1- المرحلةالاولى:  حواء

هادي المرحلة الادنى من التطور الأنيما و تسمات بحواء كدلالة لان الرجل فهاد المرحلة كايكون مزال متشبث بنموذج الأم و كيتسمى "الرجل الطفل" او حنا المغاربة كنسميواه "ولد مو" 
يونج كيوصف هادشي بأن الرجل فهاد المرحلة كايكون حساس و عاطفي بزاف و مكيقدرش يواجه المصاعب ديال الحياة و كايكون عندو مشكل فالتعامل و التواصل مع الجنس الاخر، و كيوصفو كذلك "الرجل في هذه المرحلة يكون فريسة ساهلة للنساء" و كايكون ساهل للمرأة انها التلاعب به.
كذلك كاتكون عندو الأنيما منقسمة، فهو من ناحية كيعبد الصورة الأنثوية و كاتبان ليه الانثى بحال شي كائن ملائكي و كايحساب ليه مسكين ان المرأة غادي تهتم به بحالا كتهتم به مو، بالتالي كاتلقاه كينجذب للمرأة لي كتكمل الدور ديال الأم من رعاية و حنان و عاطفة و حب اللامشروط... 

و من ناحية أخرى فهو كيحتقر المرأة و كاتبان ليه مجرد شيء باش يحقق الخيالات المثيرة ديالو.

2 - المرحلة الثانية: هيلينا 

الرجل فهاد المرحلة كايكون مهووس بالصورة النمطية ديال الجمال و الاثارة، يعني كينجذب للمرأة لي كتثير الشهوة الج*نسية ديالو و لي كتداعب الخيالات ديالو، و كايكون كل الهم ديالو فالعلاقات ديالو مع النساء هو المتعة الحسية.
و واخا كاتكون عندو المقومات ديال الجاذبية، غالبا العلاقات ديالو العاطفية مكتطولش، اولا حيث المشاعر ديالو كاتكون متقلبة و متغيرة، ليومة يكون كيبغيك لغد ليه مايسوقش ليك.
و ثانيا هو انه صعيب شي مرأة التوافق مع الصورة المثالية لي عندو فاللاوعي، حيث البنت شحال ما كانت زوينة و مثيرة غايلقى ما حسن منها.

3- المرحلة الثالثة: ماري/ مريم

هاد المرحلة سماها يونغ على اسم مريم العذراء، بحيث انه الرجل فهاد المرحلة كايكون متطور و ناضج عاطفيا و كيقدر يفرق ما بين الحب الحقيقي و ما بين الشهوة الج*نسية، بالإضافة لانه فالعلاقة ديالو مع المرأة كيتجاوز الهوى و الرغبات الج*نسية.
كذلك كيوصف يونج هاد المرحلة بأن الرجل كايكون كيحترم المرأة و كيقدرها و كيتواصل معها بطريقة محترمة + كايكون بينو و بين المرأة حب افلاطوني مبني على القيم و المثل العليا و كايكون منجذب للروح و الفكر اكثر.

4- المرحلة الرابعة: صوفيا 

هاد المرحلة مافيهاش بزاف ما يثقال حيث فعلا مكينش شي بنت لي كتوصل ليها، بحيث كيوصف يونج هاد النوع من الأنيما بأنها "في هذه المرحلة تصبح الأنيما دليلا للحياة الداخلية و الروحية للرجل" 
بحيث انها كتجمع ما بين بزاف ديال الصفات المتناقضة و كتجمع ما بين جميع الصفات ديال ثلاثة ديال المراحل لي فوق.
بحيث الرجل كايشوفها كرمز للاعتناء و الاحتواء و الحنان، و كذلك كايكون منجذب ليها جسديا و منجذب للجمال ديالها، بالإضافة لانه كايكون منجذب لها فكريا و روحيا.

حسب يونج نوعية المرأة لي كينجذب ليها الرجل من هاد اربعة نساء، كتصف نسبة التطور و النضج النفسي ديالو.

✏ Youssef Brahimi

#علم_النفس #علم_النفس_بالدارجة #الأنيما #الأنيموس #كارل_يونغ