شهادة اسرافيل بخصوص المرحومة عائشة الشنا  

علاش كاين شخص بحال الشنا؟ واش هي لي تتحرض على الفساد؟ اخي الحبيب الشنا بحال شي بوماضة تتحطها على جرح، تسبب فيه جنوي مصدي..سبب نسب اللاجهاض المرتفع و الدراري خارج الزواج،مركب شوية،ماشي هو البعد عن الدين، بل تفرشخ بنية المجتمع المغربي التقليدية..كان بكري بنادم تيتزوج بكري، و يقد يتزوج بزاف، بلا مصاريف، بلا النكافة وقاعة الافراح، يعني امكانية وجود اطفال خارج اطار الزواج، كانت محدودة.. المغرب دخلات عليه الحداثة، كما يدخل اعرابي على قوم، ماستاعد ليها موالو، جابها الاستعمار و دخل معاها نمط اقتصادي معين، ولى تيخلي بنادم يقرا مدة طويلة،و يخدم بجوج دريال، و ولاو دراري عندهم معدل زواج طالع ل 34 عام، و ابنات شي 29 عام كمعدل، و التمدين قضى على بنية القبيلة و الأسر الممتدة..الخ..وهادشي كامل انعكس على سلوكات المغاربة،بما فيها الممارسات الجنسية،كان بكري الجيلالي و فاطيمة، مفيتينش 20 عام, ولدو 4, جوج ماتو بطاعون، واحد تيسرح البهائم، و وحدة غتزوج..دابا الغالب الله، بنادم تيلعب خارج الميدان، تيسجل اهداف، تيعلنها الحكم فحالة تسلل، تتجي سيدة بحال الشنا، كتدير ال var و تتحاول تصلح مايمكن.. رحمها الله، و رحم جميع موتى المسلمين.

نشر بتاريخ 25 شتنبر 2022