كيفاش تقلبات الطاولة على الزماگرية و ولاو موضع السخرية و التهكم !

الزماكرية ولاو تيدخلو امساكن غاديين مع جنب الحايط، تيدخلو لبلاد التخوفيش و التخلويض و النوار ، ما تيفهمو والو، تتبان ليهم درية برهوشة تتحنقز بكاطكاط Jeep بيكوب، للي تتكون عند المرفحين د ميريكان اصحاب لي رانش و البڭر، و هو امدخل حديدة احسن منها تتلقاها معروضة ف Avito للبيع، امصورها مولاها حدا سينما العثمانية. تيريح فالقهوة، تيبقى يشوف فالديفيلي د البراهش خيطي بيطي تيزعرطو بهوندا Sh للي يقولو ليها "الفراشة" وكل واحد حاط على لحمو كاع الماركات العالمية من راسو حتى رجليه: كاسكيطة أندر أرمر ، تي شورت فيليب بلان، شورط اديداس، و سبرديلة نيو بلنص، و مقابل معاه مول طاكوس حاط حدا الحانوت اسكوتر X adv، غير تيتسخر بيه و هو الزغبي لابس دوك السيرفيطات صولدي للي تيجيبهم المدعو " حميد ميركادو" فالقريعة من عند ليهودي د سبتة.
تيضرب دورة فمرجان، تيبانو ليه الشاريوات مضروبين حتى للفم بالسلعة فالباركينغ، تينزل للكورنيش، تيتلاقى مع المعلم عبسلام و المعلمة نزهة، ولادهم تيقراو فالميسيون تيطيرو فالفرانساوية احسن من ماكرون، تيبغي شي ليلة ينزل يقرقب شي كويسات، تيدخل لبواط تيلقى طبلة وحدة للي خاوية، كولشي مريزيرفي، ما كاين غا التيكيت نوار و السطولة د البودفايزر، تيجيب معاه شي تليفونات يبغي يبيعهم باش يكمل الكونجي، تيلقى مول الديطاي عندو احسن منهم.... فالليل تيحط راسو و تيبقى يتساءل و يتعجب: أواه تا هاد المغرب داير هكا و حنا هربانين منو، و مريسكين بحياتنا فالبحر و مغربين على والدينا، باش للي صورناه نحطوه لولاد لقحاب فالضريبة، و الڭاز و الضو و السلاح للي تيمشي لأوكرانيا ؟؟؟ ولايني تخويرة واشمن تخويرة هادي!