الفردانية سر تطور المجتمع الغربي و عقلية الجماعة سبب تخلف مجتمعاتنا

التنويريون سبتمبر 8, 2023 0 461 أضف إلى قائمة القراءة

الفردانية هي لي خلات الإنسان الغربي يكون مستقل و مبدع و معتمد على راسو و خلاتو بعيد عن الإتكالية و فكرة الجماعة...
وأي إنسان ناجح كايحاول يوصل راسو و كايخدم على راسو...
عكس الكائن المقهور لي جماعي بطبعه ، كايفضل ينتمي للجماعة حيت الجماعة كاتغطي على الضعف ديالو...
فأي مجال ديما هد الكائن المقهور كايهضر بإسم الجماعة ، هذ الفلسفة كاتخلي الإنسان يدخل معاك فسوق كرك حيت كايشوف انه من حقو مادمت فرد من الجماعة ديالو...
مثلا جارك خاص يعرف باش تعشيتي و شكون جا عندك لدار الى أخره...
هد النوع الى كان عندو جيرانو زوافرية فراه كايتفرضو عليه فالجماعة ديالو واخا محاملهومش...
لكن فأقرب فرصة خاص يمارس عليهم الرقابة باش يخرجهم من الجماعة و يرددو مصطلحات بحال وسخو لينا الدرب ، حنا حومة محترمة...

هذ الجماعة بالمفهوم ديالهم كتحميك الى كنتي كادير أخطاء لي كايديروها كاملين لي أنت كاتشوفوهم طبيعيين حيتاش كلشي كايديرهم...

مثلا الموظفين فشي إدارة كايجيو معطلين اي واحد غادي تسولو علاش ؟
غادي يقولك اوا ترونسبور و كازا كثر فيها لحديد و ترام روون الدنيا...

بكثرة ما الفكر الجماعي مغلغل فهد الناس
مثلا بنت مشات للإمارات تقحب ،هد النوع كايصحاب ليهم راه كاتسيء ليهم في حين هي كتمثل راسها...
رغم أنه يقدر تكون ختو كتقحب غير حداه لكن خاصو يشوف شي لي تقدر يخليه ينتمي للجماعة...

هد النوع كايدير شي واحد يعبدو لي كايشوف فيه أنه واعر عليه و كايبقى يقولك راه أنا و فلان درنا... أنا وفلان كنأمنو بلي بوتين مقود...

هد النوع غالبا كايكون عندو نقص و كان محكور فصغرو و فالاوعي ديالو عارف كرو بلي فاشل علاش خاصو يدخل معاه شي واحد كايشوف فيه قدوة...

حتى علم النفس كايقولك الإنسان لي ماكايديهاش فكرو و كايحضي الناس عندو إعتلال نفسي و حياتو فارغة و كايحس بالنقص لي كايحاول يغطيه بأنه يقلب على عيوب الناس...
لكن كلشي كايبدى من الدار و خصوصا طريقة الأكل الجماعي...
مثلا الكبير فالطابلة هو لي يفرق اللحم...
لمورصو لمليح يمشي للأب ولا للضيف...
خوك صغير يالاه خرا و جا ياكل بلا غسيل غادي يمرض ݣاع لحزاق كامل ب هيباتيت بي ...
لمخاطفة بين دراري صغار هد شي كايعلمك تهرف على لي صغر ولا ضعف منك...
دخول الأب في صراعات في غنى عنها مع الأطفال...
دخول الكر عبر ملاحظات ديال فيك ريحت لݣارو...
شي لي كايدفعك تكذب...
(لا لا غير كنت مريح مع دراري فالبيار)...
تا شوف لبشير كياكل بخمس صباع...
رشيد كول بليمنية مالك يهودي...
مال مراتك مجاتش تاكل معانا ولا مراضياش بينا...
شفتك طلعتي ليها بيزا واش هي غادي تبقى عايشة غير بسقاطة و مكلة الزنقة...
كول كول راك ضعفيتي يشوفوك جيران يݣولو مكاتشبعش فكرشك...

الإنسان الغربي من صغرو كايتعلم ياكل فطبسيل ديالو مع مجموعة من الطقوس يدير سرڤيت فعنقو باش مايوسخش حوايجو...
كلشي كايسكت كتسمع غير تقرقيب ديال الموس و فرشيطة...
هذ شي كايعلمك النظام ، النقى ، دخول سوق الكر ، القناعة ...
هذ شي لي كيولد إنسان فرداني كايعتمد على كرو و ماشي شغلو فالبشري...
هذا اول درس في الفردانية...

الإنسان السوي لي متصالح مع الذات ديالو كايحاول يسعد الراسو بداك شي لي متوفر عندو...
الرياضة ولا شي هواية ولا خرجة مع الأصدقاء عكس الإنسان المعتل لي كايشفي الغليل ديالو بدخول الكر و الحقد المجاني و أي واحد مخالف معاه فراه غالط و هو و الجماعة ديالو على صواب...
كنت عاودت ليكم القصة فاش سمسار لي حط النمرة ديالي فأفيطو غير حيت ما جوبتوش واخا ماكيعرفنيش دار مجهود و ضيع من وقتو باش يديرونجيني...
أنا هد النوع كانعرفو مزيان و حتى نتوما كاتعرفوه حيتاش موجود بكثرة...
لكن ماغاديش تقدر تعرف الإنسان لي كاتعامل معاه واش إنسان سوي ولا معتل...
علاش حاول ما أمكن فهذ الحياة عمرك تدخل فشي صراع مع واحد معندو ما يخسر...
عمرك تشارك الربح ولا الخسارة ديالك مع الناس...
الناس فالربح الا كانو يكرهوك فغادي يحسدوك و يقدرو يأذيوك واخا غير بإشاعة...
وفالخسارة غادي يتشفاو فيك و أضعف الإيمان ماغاديش يسوقو ليك...

عمرك تشارك الأفكار ديالك ، الأسرار ديالك ، المخططات، الأهداف ، لخسارة...
أي حاجة وقعت زوينة ولا خايبة خليها لراسك غادي يجي نهار لي غادي يستعملوها ضدك...
حاول ما أمكن تفادا تهضر على راسك أمام الناس...
خلي الحوار ديالك مع الأصدقاء و العائلة سطحي و رمي بنادم بعيد...
هد الناس صعاب بزاف و الا لقاو عليك طريق فغادي يدمروك...
الى قالو ليك غير كلمة وأثرت فيك فراه طحتي فالفخ و دخلتي فدوامة الطاقة السلبية...

حنا الأجساد ديالنا علميا كنتج طاقة لي تقدر توصل حتى ل 400 واط و تقدر تفوت 1000 واط فبعض الحالات...
الجيش الأمريكي عندو معدات مسميهم معدات الحياة منهم راديو للإتصال ، مصباح ، ساعة كلهم كايخدمو بالطاقة البشرية...
هذ الطاقة عندها تأثير على المحيط ديالها تقدر تكون سلبية ولا إيجابية...
الإنسان يقدر يأذيك فقط الا شافك ضاحك و يتشفى فيك الا شافك تبكي...
كان جدي الله يرحمو كايقول فوت على جارك جيعان و ماتفوتش عليه عريان...

ديها فكغك فالحياة أقصر من أنك تدخل فصراعات مع إنسان بعيد عليك غير حيت ما كيشبهش ليك فالتفكير ديالك...
انا غير فوكونط ماجايش ننشر شي إديولوجية ولا نشارك رأي ديالي كانكتب على أي حاجة بغيت...
الى خديتي مني غير معلومة ولا ضحكك شي بوسط هداك هو الربح عندي...