هل ستعيش سعيدا لو كان لديك المال ؟
من الأسئلة الأزلية ليكامعندهاش جواب محدد و ماقدروش البشر يتافقو على جواب نهائي اتجاهها هو واش المال كايجلب السعادة الأبدية ؟
- أول حاجة ماكايناش شي حاجة سميتها سعادة أبدية و هاد الكلمة د " أبدية " ماشي فبلاصتها , و أنا مكانتافقش نسبياً مع ليكايقولك إلا وليتي غني فا مع الوقت غايولي يبان داكشي عادي و حياة الأغنياء غاتولي تبان ليك بديهية ...كانتافق من واحد الناحية فا مثلا إلا كنتي غني و غير جالس فالڤيلا ديالك و عاطيها غير الماكلة و النعاس و الفلوس داخلة خارجة بلا مادير تا مجهود فا أكيد غايجيك الإكتئاب و ماغاتعجبك تا حاجة فالدنيا ... أما باش تقولي دير شنو ما درتي غاتبان ليك داك الحياة عادية فا ماكانتافقش نهائياً ...
فا لي خاصكم تعرفو أنه فالحياة راه ماكايهمش واش عندك الفلوس ولا لا .. أكثر ماكايهم كيفاش كاتخلق الأحداث فحياتك فا كاين بعض الأحداث لي كاتعيشها ب 0 درهم ولكنها لا تقدر بالملايير ___ و فنفس الوقت إلا كانو عندك الملايير فا كايخصك تعرف كيفاش تخلق بيهم أحداث لي مليئين بالإثارة ... فا تخيل معايا نتا كل مرة عندك موديل جديد د BMW , كل مرة مسافر لمنطقة جديدة فالعالم و كاتعرف على ثقافات جداد , و تا إلا كانو عندك هوايات فا بالفلوس غاتقدر تنميهم و تخلي صوتك يسمعو العالم ... واش هادشي خايب و غاتمل منو ؟ أكيد لا ... و الأغلبية كايتسائل واش الأغنياء ماكايملوش من الفلوس ؟! ... أكيد ماغايملوش محيت كلما كنتي كادير شي حاجة كاتبغيها و كانت الإثارة أكثر شحال ما كاتزيد تطمع فأنك تتفوق و يكونو عندك أموال أكثر ... بحال الأهداف الصغيرة بحال الكبيرة شحال ما تفوقتي كاتبغي تزيد تتفوق أكثر ...
- و شخصيا إلا سولتوني , إلا كنت غني شنو هي أول حاجة غانفكر فيها و غانديرها أولوية فحياتي ؟
- فا جوابي هو أنني غانشري فريق كرة قدم فشي دوري مشهور عالمياً ... وواخا نبقى مقابلو غير هو و نخسر عليه كل ما أملك تا حاجة ماتهمني , المهم هو نوصلو للعالمية ... لأنني ماكانشوفش أنه كاينة شي حاجة غاتقدر تستثمر فيها فلوسك و فنفس الوقت تعيش معاها أجمل أيام حياتك و تكون مستمتع من غير كورة ... عالم كرة القدم جميل جداً ...
- حياة الرفاهية زوينة ... و غير محيت حنا يالاه مقاتلين مع الوقت و أقصى هدفنا هو لقمة العيش فا الحياة خلاتنا نوليو ذابلين من لداخل ديالنا و تا الأشياء الزوينة مابقاتش كاتبان لينا بديك الجمالية ظناً منا أننا عمرنا مانقدرو نعيشو ديك الحياة ... كاين لي vraiment مشا عليه الحال ولكن بالنسبة لواحد باقي صغير و يالاه كايْكْوْنْ فمستقبلو فا كلشي ممكن
ما هو رد فعلك؟
