لماذا نقدس الموتى و نتمنى عودتهم ؟

تقديس الميت .

فاش كيموت الإنسان وماكيبقاش جزء من حياة الأفراد — كيكون التأثير النفسي لهاد الغياب قوي خصوصا إذا كانوا الأفراد متعلقين بيه بزاف — كيميلو أنهم يوقعو فال Idealization دياله، من خلال عملية إعادة تأويل إنتقائية لعلاقتهم معاه وكيركزو فقط على الجوانب الإيجابية من التجربة المشتركة. كيضخمو الأشياء الجميلة لي عاشوها معاه في مقابل تقزيم ومحو الأشياء السلبية والأخطاء، بل أنه أحيانا كيلجاو طرق باش يزوقو الأخطاء والعيوب دياله من خلال الإدعاء أن ديك الأخطاء، ماكانتش فعلا أخطاء، بل حنا كأفراد فقط لي ماكناش فاهمين الأمر، وما استوعبناش مقدار الحكمة لي كانت كتخرج من فمه ودرجة المركزية دياله فحياتنا. هاد ال idéalisation كتكون سلبية أكثر مما هي إيجابية لأنها كتضخم مشاعر الفقد وكتصعب التجاوز، حيت كتعطي للميت أبعاد وصفات أقرب لصفات الإله منها لصفات الإنسان. هدشي كيوقع لأننا كنتناساو حقيقة أنه مجرد إنسان ومجرد نسخة من نمط أكبر كتمثل هالطبيعة البشرية فكاع التجليات ديالها ولا شئ أكثر من ذلك . بغيتي أو كرهتي، داك الإنسان ماشي استثناء، ولو كنتي فموقع آخر مع شخص آخر، كنتي غتحس بنفس الشعور وكنتي غتشوفه بنفس الهالة الإستثنائية، لأن الغياب والموت بطبعه كيخلق هالة حول الأشياء.

كنجولو أننا نقدرو نديرو أي شيء باش يرجع الشخص للحياة، أننا غنتعاملو معاه بشكل أفضل وغنعوضوه على گاع مافات. لكن الحقيقة أنه ولو يرجع، حتى حاجة مغتبدل، غنبقاو حنا هما هنا، ربما غتغير الأمور فالبداية لكن سرعان ماغترجع لوضعها المعتاد مرة أخرى، وسرعان ماغتطغى الطبيعة البشرية فبعدها اللامبالي، المتسلط والمتقلب.