حكم "دخل سوق راسك" لدى السلفيين بقلم الحسناوي
والله حتى كان كايحساب لي تدخل سوق ك** عفوا راسك، ولاتحشر أنفك في خصوصيات واختيارات الآخرين، هو مبدأ ديني جميل.
حتى تفاجأت أنه مبدأ علماني ليبرالي لاديني إلحادي ماسوني والعياذوبيلاه.
عاد فهمت علاش بزاف ديال السلفيين كايعجبهوم يدخلو لك فحياتك وخصوصياتك، ويتخلطو لك مع عظامك.
الشيخين السلفيين الفاضلين، وضحو هادشي فقناة الأنس السلفية المغربية، وقالو أن الدين بريء من هادشي ديال تدخل سوق راسك، وأنه كايعلمك تتدخل فالبشر وفالاختيارات والخصوصيات ديالهم، وأن داكشي ديال دخل سوق راسك، جابتو لينا العلمانية بنت لحرام.
المهم من دابا لفوق مايبقاش شي واحد يدخل سوق راسو ويديها فراسو، خاص كولشي يدخل لكولشي فك**..
خشيو ريوسكم ونيوفكم فالحياة ديال بنادم.
فينما بان ليكم شي بولحية، قولو ليه علاش داير اللحية، مالك مزغب، مالك على هاد الحالة.
تبان ليكم شي وحدة لابسة خنشة كحلة، قولو ليها مالك على هاد الخنشة.
شي واحد كايهضر على الدين، قولو ليه شنو هادشي....
المهم تعلمو ماتدخلوش سوق راسكم الله يرحم ليكم الوالدين، فينما شفتو شي بنادم تدخلو ليه فلباسو فالشكل ديالو فهضرتو فالخدمة ديالو فالهيوايات ديالو فالأبناء ديالو والزوج ولا الزوجة ديالو... ماتزگلو حتى حاجة، راه هذا هو الدين الحقيقي.
تقبل الله منا ومنكم.
ما هو رد فعلك؟
