هل الكائنات الفضائية حقيقة علمية ؟ وما علاقتها بمقياس كرداشيف

واحد التوضيح عاد نكمل انا غير كايعجبوني هد المواضيع لي فيهم الغموض و كانبغي نبارطاجي مع الأصدقاء...
بنتليك غير كانخربق تفضل مشكور قود من عندي و هني راسك...

الإنسان منذ القدم كان مهووس بالسماء لي  كان يجي منها الخير  عبر الأمطار و الشر عبر العواصف و البرق و الرعد...
و هد الهوس خلاه يبني عليها ميثولوجيا روايات قصص أساطير...
و الى يومنا هذا باقي هد الهوس حيتاش رغم تطور العلم مازال ماكنعرفو والو على الفضاء...
السوماريون هضرو على ناس جاو من السماء و علموهم العلوم و صوروهم بشكل الإنسان لكن أكبر حجما...
تذكرو فالأديان بحال الملائكة و نيفليم لي نزلو للأرض...

كانو روسومات قديمة كاتبين أجسام طائرة في السماء بحال واحد اللوحة كاتعود ل سنة 1500...
لكن أول واحد غادي يدون هد المشاهدات هو كريسطوف كولومبوس فالمذكرات ديالو لي قال فيها...
انه شاهد اطباق طائرة مضيئة كانت تحوم بالقرب من سفنه الثلاثة اثناء عبوره للمحيط الاطلسي لاكتشاف العالم الجديد و هي اول شهادة موثقة تاريخيا...

تقريبا مور هد القضية نادرا ما غادي يتذكرو هد ufo ولا الكائنات الفضائية حتى لحادثة روزويل سنة 1947...
غادي يسقط شي جسم طائر فشي ضيعة فأمريكا...
غادي يشوفو بزاف الناس قبل السقوط مجموعة من الأضواء الساطعة...
غادي يوقع إنزال عسكري كبير فالمنطقة لي غادي طوق باش ميوصل حتى واحد لمكان الحادثة...
السكان المحليين جاهم هد الإنزال غريب بزاف و زاد غرابة مين خرج التصريح الرسمي بلي غير منطاد مراقبة الطقس تعرض للسقوط...
اليوم لي موراه غادي يخرجو صور ديال جسم غريب
ماشي منطاد و هد الصور خداوهم السكان المحليين شي لي غادي يتسبب ففوضى فأمريكا...
مؤخرا مين ترامب رفع السرية على بعض الوثائق غادي تخرج للعلن حوار مع اول ضابط وصل للمكان و شنو شاف فالوصف ديالو قال بلي شاف جسم غريب داير بحال الطبق و جوج كائنات ملقية على الأرض...
مور هد الحادثة...
غادي يوصلو بزاف التقارير من الناس لي كاينين فالمفاعلات النووية ديال الإتحاد السوفياتي...
و المضمون ديالهم هو  ملاحضة أضواء في السماء لي كاتقرب من المفاعلات و بعض المرات كاتوقف التشغيل ديالها عن بعد و تمشي...
هد الملف تعطاه إسم أطباق قنديل البحر و حرك ناس على أعلى مستوى في البلاد للتحقيق فهد القضية...
و بعد ما تأكدو بلي ماشي أمريكا غادي يشاركو معاها هد المعلومات و غادي تأكد أمريكا بلي نفس المشكل وقع عندها...
هد شي غادي يأكدو إدغار ميتشيل لي واحد من الناس لي طلعو للقمر و غادي يقول بلي هد الكائنات زارو عدة مواقع نووية في أمريكا و وقفو التشغيل ديالها كرسالة باش مايستعملوش هد الأسلحة...
النازا من بعد خرجت بتصريح و قالت بلي إدغار ميتشيل رجل  عظيم بصح مكانتافقوش معاه...
أمريكا رفعت السرية على بزاف حوادث مشاهدات الأطباق الطائرة و منهم بزاف الحالات فالمغرب...
و أشهرهم في المغرب هي حادثة  سنة 1976 لي بزاف ديال جوندارم شافو أطباق طائرة و القضية وصلت لأمريكا و ظمستها حتى خرجو هذ التقارير لي فيهم المقابلات مع هذ الجوندارم و الرسومات ديالهم لهذ الجسم...

نازا بحدها قالت أنها درست 800 حالة...
سنة 1994، 62 طفل فمدرسة في الزيمبابوي كانو يلعبو في الإستراحة غادي يشوفو ثلاث أطباق طائرة كاتقرب منهم...
غادي ينزل منهم شي كائن غريب و غادي يبقى يشوف فيهم...
و غادي يوصل ليهم رسالة بلي البشرية راها تلعب فالنار الى اخره...
غادي يمشيو يجريو يقولها لمدرسين ديالهم لي غادي يخرجو ما يلقاو والو...
غادي تجي الصحافة المحلية و العالمية و غادي يجي دكتور أمريكي  لي غادي يقول بلي رغم انه ماشاف والو،  لكن كاتيق هد الدراري صغار بلي شافو شي حاجة...
دارو الابحاث و مالقاو حتى أثر على وجود شي مركبة شي لي كايبقى لغز محيير...
موخرا جيمس فوكس غادي يدير وثائقي سميتو the phenomenon...
و غادي يقلب على هدوك الدراري ، اليوم كبرو لكن غادي يأكدو نفس القصة لي قالوها هدي 20 سنة...

هد الحوادث كاملة ديال المشاهدات فيهم بزاف ديال الإدعاءت و فيهم بزاف ديال الحقيقة...
مؤخرا البانتاغون الأمريكي ستقبل عميل سابق ف المخابارات الأمريكية لي قال بلي كايعرف ناس شافو أطباق طائرة و شافو فضائيين و جاب معاه طايرين عسكريين لي شافو هد الأطباق الطائرة ولي بلغو بهد المشاهادات و فيهم ناس مكا تطمح لا لشهرة لا حتى حاجة...
 المرصد الشمسي SOHO رصد واحد الجسم دخل وسط الشمس و فجأة انطلق بواحد السرعة خيالية...

كاين بزاف المشاهدات على وجود الفضائيين
لكن الحد الأن مكاينش شي دليل لي يعتدى به عند ناس العلم و عند الناس العادية...
هذ الكون لي حنا فيه شاسع بزاف لواحد الدرجة مخيفة جدا...
تخيل راسك إنسان فغابة مظلمة  كبيرة مليئة بالوحوش و هاكاك نحن فهذ الكون...
فقط نقطة زرقاء فواحد المجرة لي وسط واحد الكون عظيم لي حسب ماقالو العلماء الكون المرئي فيه 200 مليار مجرة...
كيفاش هذ المدة كاملة ديال 13،8 مليار سنة و مكايناش شي حضارة أخرى...
صنفو العلماء بزاف الأمور علاش مقدرناش نتواصلو معهم  أولها الفارق ديال الزمن...
ثانيا ربما الظروف لي خضعنا ليها باش تكونا مخضعوش ليها هوما...
مثلا هوما كايكلو الكريستال باش يعيشو ولا عندهم أجساد غازية، ماشي بحالنا كانحتاجو الهواء و الماء...

واحد العالم سميتو كارداشيڤ
ݣاليهم حابسو خاصنا نعرفو قيمتنا بعدا فهاذ الكون...
و دار واحد المقياس لي سميتو مقياس كارداشيڤ...
هذ المقياس هو طريقة قياس التقدم التكنلوجي لشي حضارة...
النوع الأول هو حضارة لي قادرة تسخر ݣاع الطاقة لي عندها فالكوكب ديالها...
النوع الثاني حضارة قادرة ستخر طاقة الشمس ديالها...
النوع الثالث حضارة قادرة تسخر الطاقة لي فالمجرة ديالها كاملة...
حنا فهذ الأرض طبعا فالنوع الأول لكن مزال موصلناش حتى 1 في المئة من تسخير الطاقة لي عندنا في الكوكب...
نحن كبشر يالاه طورنا شوية هذي سنين قليلة  بفضل بعض العقول لي قدرات تخرجنا من التخلف ديالنا...

هذ 300.000 سنة لي عمر فيها الإنسان الأرض يالاه هذي مكاملاش 100 سنة فاش الإنسان قدر يصنع الكهرباء و يبدا يستغل شوية الطاقة الأحفورية لي عندو...
السؤال المرطروح فين هوما الفضائيين ؟
 غادي يجاوب عليه واحد العالم أمريكي سميتو روبين هانسن عبر واحد المفارقة...

هذ السيد كايقول بلي ربما كاين واحد الفيلتر عظيم فالكون او نقدرو نسميوه غربال ،هذ الأخير صعيب باش دوز منو...
و الى حنا البشر دزنا منو فراه الحضارات لي مورانا يلاه دازوه و مزال معطلين تكنولوجيا...
أو مزال هذ الفيلتر جاي فطريق ومين غادي نوصلو ليه غادي نقارضو كيف الحضارات لي سبقونا مين وصلو ليه نقارضو...
الفرضية الثانية غادي نربطوها لمقياس كارداشيڤ ، و بهداك الجسم لي ستعمل طاقة الشمس تقدر تكون شي حضارة متطورة بزاف  لكن كايشوفو فينا بحال شي كائنات ضعاف لي مغادي نفيدوهم فوالو...

مثال أنت دايز على غار فيه نمل واش غادي تسوق ليه طبعا غادي دوز بدون ما حتى تلاحظ وجودهم...
و ربما تدعس عليهم و تقتلهم بدون ما تحس...

المثال الثالث هو ديكالاج التكنولوجي ربما يقدر يكونو شي مخلوقات لي مطورين علينا بزاف لدرجة ملاحضوناش كاع...
مثلا انت كاتسيفط لشي واحد رسالة عبر الحمام الزاجل و كاتسناها طلع ليه فالواتساب...

المثال الرابع لي هو المسافة تقدر تكون شي حضارة بعيدة علينا بملايين السنوات الضوئية لكن مين راقبونا يالاه لحقو يشوفو هذاك أحادي الخلية الأول...

المثال الخامس هو وجود بزاف ديال الحضارات لكن كاين فوسطهم شي حضارة مفترسة و كلشي ساقل منها الا حنا لي كانطيرو من المقلة حتى كارل سيغان قبل مايموت قالهم حبسو إرسال الرسائل للفضاء نبقاو فقط نلاحضو و نتسنطو...

المثال السادس هو حديقة الحيوان يقدرو يكونو كايلاحضو فينا هذي ألاف السنين كيف كنتطورو بحال حنا كانلاحضو الحيوانات...

كاين بزاف النظريات علاش لحد الأن مبانوش...
هذ شي ماشي ضحك و ماشي خيال علمي...

أمريكا من 1930 و هي مخصصة مزانية و مركز ديال المراقبة ديال الفضاء...
و كانو مشاريع كبيرة بحال مشروع الكتاب الأزرق للمراقبة الفضائين...
اليوم بزاف العلماء لي كايقولو بلي فسنوات القادمة غادي نقدرو نكتاشفو شي حضارة فالمجرة ديالنا...
كيف قال العالم البريطاني آرثر سي كلارك
كاين جوج إحتمالات إما حنى بوحدنا فهذ الكون ولا حنا ماشي بوحدنا و كلاهما مخيف بنفس الدرجة...

اليوم البرلمان المكسيكي جاب هد الجثث على حد قولهم ديال كائنات غير بشرية...
طبعا السياسيين ماشي معيار باش غادي تأكد بلي هد الكائنات حقيقية ولا غير شي واحد سرحهم...
لكن حتى واحد ما دار ليهم دراسة غير بنادم كايهضر و مجموعة من الفرضيات في إنتظار تكون شي دراسة جدية و نشوفو...
أما فيما يخص المؤامرة و هولوغرام فكتبقى هضرة فقط...
أمريكا و ألمانيا و الإتحاد السفياتي خسرو ملايير الدولارات باش يقلبو فهد الظاهرة فقط باش يخليوك انت متبقاش تصلي و أصلا أنت مكاتصليش...