صفات الشخصية المنحرفة النرجسية

#شخصيات_مضطربة
#المنحرف_النرجسي ...
#الجزء_الاول

من اخطر الشخصيات لي ممكن تصادفها فحياتك ولا طيح فالشبكة ديالو ...و الخطورة ديالو كتكمن فالذكاء ديالو باعتباره كيكون عنده ذكاء اجتماعي جيد و غالبا انسان مثقف و كيكون عنده مجموعة من الصفات لي ميمكنش متخليكش منبهر بيه مثلا : محدث لبق un bon parleur، الثقة فالنفس الزائدة الى حد النرجسية و لي هي فالجوهر ديالها كيخبي من وراها فالحقيقة ضعف الثقة فالنفس ،غالبا كيكون محلل جيد و كيعرف يقنعك بالحاجة و ضدها فنفس الوقت ، جميل الشكل و المظهر و انيق ، مايقبلش قل من المرتبة الاولى فكلشي لا فالعمل و لا فالمكانة دياله مع الاصدقاء او شريك الحياة ،..كاريزما قوية ... يقدر يكون كيمارس اكثر من هواية : الموسيقى ، الغناء، الملاكمة،السفر... و اهم نقطة انه كيبين ليك انه انسان عميق فاهم الحياة و دوز شلا تجارب و انه عانا بزاااف فحياتو و تآذا بزاف و كيولي يعيش دور الضحية فالاول و من بعد دور البطل و المنقذ و انه الى دخل فحياتك فراك انت محظوظ او محظوظة ..

اول حاجة نبغي نشير ليها هي الفرق ما بين الشخصية النرجسية و الشخصية المنحرفة نرجسية :
الشخصية النرجسية هادي شخصية موجودة بيناتنا، ومهم بزاف أننا نفرّقو حيت كاين فرق كبير بين شخص عنده ميول نرجسية مقبولة وشخص مصاب بإضطراب الشخصية المنحرفة النرجسية. الشخص للي عنده ميول النرجسية شخص عادة محبوب وشخصيته جذابة، كيكره النقد و كيبغي يسمع كلمات الإطراء و حاس براسو شوية كيف كانقولو، وكيبغي يكون محور العلاقات اللي كيدخل فيها وأناني شوية وحتى الى كان معطاء كيكون معطاء باش يفرح  راسو حتال لهنا مازال فحدود الطبيعي.فضروري نركزو في هذه الحالة، على {انحراف} الشخصية. و ماخصناش نخلطو بين هذا الانحراف والنرجسية البسيطة اللي كتميل بدورها للتلاعب بالآخر وعدم التفكير إلا بالمصلحة الشخصية و لكن ماشي لدرجة انه يفكر يآذيك . لكن يكمن الفرق في الواقع أن النرجسية أحد أشكال المعاناة لأسباب متنوعة، و كترجع اسبابها عموماً إلى مرحلة الطفولة،فأما الشخص إللي عنده انحراف نرجسي بالإضافة لهادشي كامل لي قلنا كيكون أناني بشكل ملحوظ، ومؤذي، وكيتلذذ بالتقليل من الآخرين وعمره ما كيعترف انه غالط ومعندوش تعاطف مع الناس ولا مشاعرهم..حيث اصلا التكوين النفسي ديالي فيه خلل على مستوى العاطفي ( émotionnel ) يعني مكيعرفش يبغي شي حد اصلا و مكيعرفش يبغي راسه...

فالمنحرف النرجسي
كيحاول بجميع الطرق انه يضرب توازن الآخر، ويدير راسو ديما فبلاصة الشريك أو الأهل أو أي شخص فمنصب متفوق عليه. كيحاول يدخل فعلاقة مباشرة مع الضحية باش يتمكن من التلاعب بها مني يبغي. وممكن يوصل لدرجة الإخلال بتوازن شخصية الآخر
بالكامل أو تدمير حياته المهنية.
المنحرف النرجسي ماشي بالضرورة يكون راجل ممكن يكون امراة