ثوب "الجينز" : أصله و مراحل تطوره عبر التاريخ

جينز او Denim الاصل ديالو ماشي امريكي كيما تيعتاقدو اغلبية  ، بل هو ثوب فرنسي و بان فالقرن 15, وتسمى ب Denim نسبة للمدينة الفرنسية  Nimes حيث كان تيتقال على ثوب De nimes اي قادم من مدينة نيم وتما اتلصق ليه Denim و ف الاول كانت دينيم تيتصاوب من القطن و الصوف  بنسبة متفاوتة و بسبب شروق عصر النهضة غادي الثوب يبدا يتسركل و ايلقا اقبال بسبب صلابته و تحمله لضغوطات دون تمزقه و بسبب عصر النهضة و ازدهار التجارة ايوليو تياخدوه الايطاليين و تيتاجرو بيه و ايولي تيتصدر نحو انجلترا عن طريق ميناء مدينة Genes و ايوليو تيقولو التجار انه de genes اي قادم من مدينة جين و تما ايلصق الاسم المرادف ل نوع الثاني والمتقارب و اتولي سميتو jeans ولي تيتصاوب من القطن ، و غادي الثوب يعيش الازدهار ف انجلترا و ايوليو التجار و المهاجرين الانجليزين لي تيمشيو لأمريكا تيديوه معاهم و تما غادي يعرف الانفجار من مدينة سان فرانسيسكو  بسبب حمى الذهب و عمال المناجم و المصانع  وكان دلك عن طريق المصمم levis strauss ، وبقا الجينز لصيق لعشرات السنين بأنه ثوب ولباس ديال السلاكط و الشماكرية و المعدمين حتى غادي تجي مرحلة الموضة الانتقامية لي بانت ف هولييود و لي كان من روادها العظيم مارلون براندو و المبجل ستيف ماكوين و  الاسطورة جيمس دين و لي دخلوه صحة ف ستيل لايف ديال الرجل و تمردو به عن السائد و عن دور الازياء الراقية الفرنسية و الايطالية وغادي يتم دمقرطة الجينز و دينيم و ايولي قطعة تيلبسوها الشباب و مختلف شرائح المجتمع من الغني الى الفقير و من الصغير الى الكبير و من الرجال الى النساء