الوالي يرد على نزار بركة بعد مطالبة هذا الأخير للأساتذة بالمردودية

الوزير اللي ما عندو ما يدار كينوض يهدر على الأساتذة ويطالبهم ب"المردودية". بنفس المنطق حتى الحكومة راها مطالبة بالمردودية. ومقياس مردودية الحكومة هو الاستجابة للمطالب الشعبية. والحكومة اللي ما تحقق لينا والو فهي عديمة المردودية. والوزراء اللي ما يحققوا لينا والو فهم وزراء فاشلين. وخاصكم تقدموا استقالتكم وتخليوا المقاعد ديالكم لناس اللي عندهم الكفاءة وقادرين على تحقيق المردودية.
هذا من باب البوليميك السياسي اللي ما كاين ما أسهل منو وحتى أنا نعرف ليه. أما خارج البوليميك إيلا بغيتي المردودية ديال اليابان أ السي نزار بركة أعطيوا لكل أستاذ ثلاثة ديال الأقسام، كل قسم فيه 15 تلميذ على الأكثر، وهذا معناه أنكم خاصكم توظفوا ضعف العدد الحالي ديال الأساتذة خمسة ديال المرات. وزيدوا عدد الحراس العامين، ورجعوا المعيدات والمعيدين، وأعطيوا للأستاذ(ة) وضع اعتباري كيليق بمكانة ومهمة الأستاذ(ة) وأعطيوه صالير بحال اللي كتعطي اليابان للأساتذة. المردودية ماشي ب 400 تلميذ(ة) فالعام و40 تلميذ(ة) فالقسم. ماشي بعشرين ساعة ديال الخدمة فالقسم ومعها عشرين ساعة أخرى خارج القسم ديال التصحيح والتحضير و... ماشي ب 5 آلاف درهم فالشهر، ماشي بأساتذة كيعيشوا على الكَفَاف.
الهدرة ما كاين ما أسهل منها. وإيلا ما كايناش الشروط الموضوعية ديال المردودية فبكل بساطة ما عمرها غادية تتحقق. وما تگولش لينا حگا ما كايناش الفلوس لأن هاذي مهمة الحكومة. وإيلا ما عرفتوش تجيبوا الموارد المالية الضرورية للنهوض بالتعليم والصحة والسكن و... راكم حكومة فاشلة وعديمة المردودية. وتفضلوا أعطيونا التيساع.