العلماء يطالبون بتوقيفٍ مؤقت لتطور الذكاء الإصطناعي العام !

وقعت على هاد العارضة حول الذكاء الاصطناعي.

عقلتو باش بدات الدراما ديال فبراير 2020 وبنادم اكتاشف فيديوهات قدام ديال Bill Gates كيقول فيهوم انه خاص التحكم فالجراثيم واننا نطورو قابلية الاستعداد ديالنا لمواجهة الاوبئة.. وكلشي ففبراير 2020 كان كيقول "واااو" كيفاش هضرة ناس فحال هادو اللي توقعو بالضبط النوع ديال السيناريوهات اللي شفنا بعينّا كيطراو.. كيفاش حتى حد ف2010 ما سمع هضرة هاد الناس.

نفس هاد الشي طاري دابا فالمجال ديال تطور "ذكاء اصطناعي عام".. واحد المجموعة ديال العلماء من بينهوم عالم الفيزياء Max Tegmark وعالم الذكاء الاصطناعي Joshua Bengio (غادي نحط قريبا استجواب درتو معه مؤخرا) وYuval Noah Harari وآلاف من الشخصيات الاخرى فحال Elon Musk وقعو رسالة مفتوحة كيطالبو فيها بالتوقيف المؤقت، ماشي ديال البحث فالذكاء الاصطناعي ولكن توقيف مؤقت ديال الإنزال ولا الdeployment ديال انظمة جديدة فايتة GPT4.. يعني نكتفيو بGPT4 والانظمة الشبيهة الحالية اللي براسهوم التاثير ديالهوم على الاقتصاد غادي يكون هائل.. ونركّزو على البحث العلمي فالأمان ديال هاد الانظمة اللي ديجا بدات عندها بوادر ديال انها تقدر "تخرج على السيطرة" ولا انه يتم استعمالها كاسلحة فايتة اي نوع من الاسلحة معروفة اليوم.

مع الاسف مكنظنش ان المستوى ديال النضج ديال الناس اللي عندوم القرار على المستوى العالمي غادي يكون كافي باش يطبقو هاد البلان ديال الpause large scale deployments.. وغالبا غادي يطرا فحال سيناريو ديال 2020.. غير هو الخايبة هي ان 2020 كانت نوعا ما نسبيا "ساهلة" حيت نسبة الاماتة ديال داك الجرثومة لا علاقة مع "ذكاء متطور بما فيه الكفاية وداير فبالو هدف غير متوافق مع البشر ومستعد يستعمل جميع الوسائل المتاحة قدامو باش يوصل للهدف".. فرق كبير بين جرثومة وبين ذكاء متطور.

فأول تعليق كاينة صورة فيها العناوين ديال الوسائل المختلفة اللي ذكاء اصطناعي متطور يقدر يشكّل مخاطر على الانسانية.. الصورة من احد الاوراق العلمية اللي كترجعليها الرسالة المفتوحة اللي الرابط ديالها فأول تعليق كذلك.