تعليق عن كثرة ظهور الرگراگي خارج الميدان الغير مبرر
كايكون ماتش ديال منتخب الشبان كاتلقى الركراكي حاضر ..
ماتش المنتخب الاولمبي ضروري الركراكي حاضر.
ماتش المنتخب النسوي تحت عشرين سنة ضد اذربيجان، كاتلقى راس لافوكا كاين ..
كايكون الديربي، ضروري الركراكي حاضر..
كايكون جوج ماتشات ملعوبين فخطرة وحدة فالبطولة الوطنية، والماتشات منقولين مباشرة، الركراكي ضروري تايكون حاضر فيهوم بجوووج كيدار ليها مانعرف..
حفلة ديال آخر السنة ديال شي خيرية فشي دوار حدا دمنات كاتلقى الركراكي كايعطي الجوائز..
حفل تخرج فوج من الاطفال المصابين بالتوحد، ضروري مول النية تايكون ضيف شرف وكايتصور ويوزع الايبادات على المتفوقين..
تايكون تكريم شي فنان، تايعطيو للركراكي شرف تسليم التذكار..
محاضرة حول مرض البيوض الذي يصيب النخيل في واحة تافيلالت ودرعة، خاص الركراكي يكون حاضر..
عائلة خارجة للبحر تشلخ دلاحة وتسنط لعضامها، كايبان ليها الركراكي مع بنمحمود كالسين حداهوم وغريب أمزين مضبر ليهوم على هاواي كانيط..
كايدير شيواحد عرس كاتمشي تفرح حيت معروض، حتى كاتسمع الجوق، " هادي في خاطر راس لافوكا من هنا حتال قطر"، حيت الركراكي حاضر تما ومعشي ومعلق للجوق ربعالاف..
فافتتاح قنصلية جمهورية سورينام بمدينة الداخلة، ضروري الركراكي هو اللي يعطي السوارت للقنصل الجديد..
مشيتي لمخبزة تجيب جوج باكايطات تفطر بيهوم .. مكاتفيق حتى كاتلقى الركراكي بالطابلية بيضة كايرد ليك خمسين ريال ديال الصرف…
من نهار كانعقل على راسي كانتفرج فالكورة كانلقى مدرب المنتخب الوطني ديال فرنسا او اسبانيا او ألمانيا … مكايبان حتال يوماين قبل الماتش كايدير ندوة صحفية كايعلن على اللائحة وكايدير ندوة صحفية مورا الماتش مباشرة، صافي وسالات المهمة ديالو اللي كايتخلص عليها… وحنا المدرب ديالنا بحال برقوق العراسات فينما مشيتي تلقاه، وضومينات ماعند جد دين مهوم علاقة بالكورة..
ارحموووونا هااا العار، إن كثرة الظهور تقتل..
ما هو رد فعلك؟
