تشخيص الاضطرابات العقلية بين الماضي و الحاضر

المجال ديال الاضطرابات العقلية والنفسية خاصو تغيير جذري فالكيفية باش الناس كيفهموه. العلم الحديث ضرب طريق طويلة فالموضوع.. من ايامات القرون الماضية باش كنا كنهضرو على جوج دالحالات ديال الانسان: "الانسان السوي".. مقابل الانسان "الاحمق" و"المجنون" و"فقد عقله".. الى ما يعلّمه لنا العلم الحديث المبني دابا على عقود ديال التجارب العلمية سواء على العضو ديال الدماغ ولا على سلوكات البشر.
من بين هاد الدروس اللي علّمنا العلم الحديث:
ـ كل ما يسمى بالاضطرابات النفسية هي موجودة فطيف متدرّج. ما كان يسمّى قبل ب"الانسان السويّ" هو غالبا غادي تقدر تلقى فيه شي بركة ديال 15% من الفصام (schizophrenia) ولا 23% ديال الاكتئاب ولا 7% من ثنائي القطب (bipolar disorder) وفمراحل مختلفة من الحياة هاد النسب تقدر تطلع وتهبط ولا تدوز مثلا ل85% ولا 90% الشيء اللي غادي يستوجب تدخل طبي. ولا تعاود ترجع تهبط.
ـ "اضطراب نفسي" لا تعني أنك "انسان أسوأ" أو "انسان أغبى".. بل يقدر يكون العكس حيث ان عدد من الدراسات كتشير ان الناس اللي عندوم عدد من الاضطرابات النفسية كيكونو أفضل فعدد من مناحي الحياة. ارتباط التوحد مثلا بنتائج افضل فالماط.. ولا ثنائي القطب مع الابداع والفن. (ارتباط طفيف طبعا ولا يعني ان ضروري يكون فيك التوحد مثلا باش تكون مزيان فالماط هادو نتائج احصائية وليس حتمية ولكن كتضرب فالفكرة ديال انه "هاداك احمق لا عقل له" اللي كيتسحاب للكثير). فالمقابل طبعا عدد من الاضطرابات كتقدر تأثر سلبيا على جودة القرارات اللي كتتّاخذ ولا على عقلانية الامور اللي كتقول ولا اللي كتآمن بها (فحال دراسات حول ارتباط الاطياف المتدرّجة ديال الفصام مع الايمان بالأمور الخرافية).
ـ عدد من الاضطرابات اللي قبل مولاها كان كيتحكم عليه يعيش الباقي ديال حيتاو بالوصم ديال "احمق" اليوم مثبت علميا ان الادوية عندها فيها نجاعة هائلة. غير هو هاد النجاعة مرتبطة فاحيان كثيرة كذلك بخدمة خاص يديرها المريض، الطبيب ديالو وعائلتو. بما فيه ما يسمى العلاج المعرفي السلوكي اللي المريض خاص يبقا يقيد حاجات بشكل دقيق فدفتر ويتقيّد بپروتوكولات صارمة فالسلوك ديالو باش يتعالج. يعني القضية ديال "مشيت عند الطبيب وعطاني دوا ما دارلي والو" هي فاحيان كثيرة نتيجة ديال خلل فالمنظومة كامة اللي فيها الفرد والمجتمع والمنظومة الصحية، ماشي خلل فالپروتوكول العلاجي (فالمقابل طبعا عدد من الپروتوكولات كتخدم بشكل احصائي، مثلا حاجة اللي كتعالج بنسبة 60% معناها ان عدد من الناس ماغاديش يجي معاهوم العلاج.. دون الحديث عن صعوبة التشخيص فاحيان كثيرة).
ـ ما هو نفسي ينبثق من ما هو عضوي اللي هو العضو ديال الدماغ. مثلا اليوم تقدر تكون كتعاني من نوع ديال الاكتئاب، تمشي عند طبيب يغرسلك سلك ديال الضو فدماغك فبلاصة معينة ويشعل الضو تما. وفجأة غادي يمشيلك الاكتئاب اللي عذبك لعقود وتولي تشوف الحياة بشكل إيجابي. فقط بضغطة زر. وورم فالدماغ يقدر يحوّلك إلى انسان عندو تصرف اجرامي فحال اللي طرا فعدد من الحالات الموثّقة. التشابك بين ما هو عضوي وما هو نفسي هو اكبر بكثير من شنو كان كيتسحاب للناس قبل.