قتل والدي زوجته وهو نائم !

#القتل_المباح
#السرنمة

مؤخرا وليت كنلقى المتعة ديالي فأنني نبحث فعلم الإجرام وعلم النفس الجنائي وحتى الطب الجنائي علاش لا.. 
واحد النهار وأنا كنقلب على جرائم القتل اللي تحكم فيها ببراءة المتهم واللي كيكون فيها ظروف شويا غريبة..
من بين هاد الجرائم ندويو على قصة كينيث باركس.. 
باش نحطك في أحداث القصة تخيل أنك في ليلة من الليالي من حياتك الطبيعية كتعيشها مع الزوجة ديالك.. جالس فوسط الدار تتفرج فالتلفزة ودماغك مرفوع حيت فيك كريدي كثير بسبب الشوماج وقلة الخدمة وزيد عليها القمر حتى هو.. شويا تفكرتي بلي نسيبك ونسيبتك (والدي الزوجة ديالك) واعدوك أنهم غايعاونوك تخرج من هاد المشاكل المالية ديالك.. المهم بينما كنتي تتفرج غلبك النعاس ونعستي فبلاصتك نيت..
واحد اللحظة ضرباتك الفيقة لقيتي راسك مشدود فالحبس بتهمة القتل العمد وتهمة أخرى ديال محاولة القتل.. ايييه نعاماس ونزيدك الشخص اللي قتلتيه هو نسيبتك والشخص اللي كنتي كتحاول تقتلو وماماتش ليك هو نسيبك..
هاد القصة هي اللي وقعات ل"كينيث باركس" فالليلة ديال 24 ماي 1987.. حيث أنه هز السيارة ديالو ومشا للدار ديال نسابو اللي كتبعد عليه تقريبا بشي 23 كلم ودخل للدار اللي اصلا عندو السوارت ديالها هز جنوي ومشا نيشان قصد نسيبو ونسيبتو ففراشهم ونزل عليهم بالضرب بهاديك الجنوي حتى قال راهوم ماتو وخرج.. موراها قصد أقرب كوميسارية وهو عامر بالدم وقف عليهم وقاليهوم بالحرف "أعتقد أنني قتلت شخصين للتو"..
طبعا خونا باركس تشد فالحبس ولكن هو أنكر أنه قتل نسيبتو وكايدعي أنه ماعاقل على والو من داكشي كامل وبلي نسابو عزازين عليه من المستحيل أنه يقتلهم لأي سبب من الأسباب..
من بعد 5 سنين من التحقيق والاختبارات النفسية والفحوصات والتخطيط الكهربائي اللي داروها أخصائيين نفسيين على باركس وأخيرا تحكم عليه بالبراءة فشهر غشت عام 1992 بحجة أنه أثناء وقت الجريمة كان كايمر في حالة تسمى بالسير أثناء النوم..

السير أثناء النوم أو السرنمة هو حالة كاتصيب بعض الناس أثناء مرحلة النوم العميق (ماشي مرحلة الأحلام كيما كيعتقدو بعض الأشخاص).. والاحصائيات كتقول أن النسبة حاليا تقارب 4٪ في صفوف البالغين.. وفهاد المرحلة ممكن للأشخاص المصابين يديرو بزاف دالحوايج دون علم منهم تبتدأ بالجلوس والتأمل في محيط الغرفة وصولا الى الخروج والقيام بأفعال روتينية أحيانا مثل قص عشب الحديقة وقد يصل الأمر أحيانا أيضا إلى ارتكاب جرائم جنسية أو حتى جرائم قتل..
لحد الآن مكاينش شي تفسير علمي على أسباب السرنمة غير أن بعض العلماء كيعتقدوا أن السبب هو قفز الدماغ من مرحلة النوم العميق إلى مرحلة الاستيقاظ دون المرور بمراحل النوم الطبيعية الاخرى التي تسبق الاستيقاظ.. وبما أننا معارفينش الاسباب فبالطبع العلاج حتى هو مكاينش لحد الآن..
ملاحظة : كينيث باركس هو فقط حالة واحدة من بين اكثر من 60 حالة اللي حكم ليها القانون بالبراءة بسبب مايسمى بالسرنمة..
واش حتى نتايا كاتعاني من السرنمة أو عندكم شخص فالعائلة يعاني منها؟

#مورفين