دور الجالية المغربية في الرفع من الإقتصاد الوطني

الفضل ديال الجالية المغربية على هاد البلاد السعيدة لا يقدر بثمن وكنتخايل كون مكانتش عندنا 5 مليون مغربي فديار المهجر كيفاش كان غادي كون الاقتصاد ديالنا ..

واش فراسكم أن التحويلات ديال خوتنا وعائلاتنا وصحابنا فالغربة تجاوزات 100 مليار ديال الدرهم كرقم قياسي غير مسبوق ف عامين متابعة ♡

بصيغة أخرى لفلوس والعملة الصعبة لي كيصيفطوا مغاربة العالم للبلاد فاتت وتجاوزات المداخيل ديال الفوسفاط وكاع الصادرات المغربية خصوصا قطاع السيارات لي كيتصنع هنا وكيتصدر للعالم كامل ..

المغاربة لي على برا كيحتلوا المرتبة الثالثة قاريا من حيث قيمة التحويلات من بعد مصر ونيجيريا و أكبر نسمة منهم هي لي في فرنسا ب مليون مغربي متبوعة ب اسبانيا ب 900k وبلجيكا ب 570k وتتجي ايطاليا ب 423k وهولندا ب415k والباقي مفرق ف شتى بقاع العالم ..

الفلوس لي كدخل من العملة الصعبة كتنعش الخزينة ديال الدولة وتتعاون بزاف خصوصا فتقلبات سعر الصرف ديال الدرهم وكيستافدوا منها عائلات وأسر الجالية باش يتعاونوا بيها على دواير الزمان وبيها باش كتحرك عجلة الاقتصاد.

فاش كيدخلوا دراري ديال الطاليان وفرنسا وهولندا للمغرب كيديروا مشارع واستثمارات بعقلها فالمدن لي كبروا فيها وشحال من مدينة تبنات وطلعات غا بفلوس الجالية ..

المغربي حيت أصيل وخا كيهرب من بلادو لسبب من الأسباب ولكن جامي يخونها ولا يبدلها وكيتقاتل باش يشوفها ف أبهى حلة وعلامها يبقى ديما يرفرف فالأعالي ????????

هاد الفضل ديال الجالية تقدرو تشوفوه وتلمسوه مزيان فالمنتخب انطلاقا من المدرب لي كيتعتابر واحد منهم و 90% من الفريق لي كاملة تغربات وقاسات باش وصلات وهزات الدرابو فإنجاز عمرو يتنسى ..

لهذا رفقا بالجالية ديالنا العزيزة والغالية تهلاو فيها را هي راسمالنا ونهار يبغيو يجيو متغليوش عليهم ثمن التذكرة ديال الطيارة باش تبروفيتيو فيهم حيت حتى هوما عالم بيهم غير الله ????