عبدو بوتفادين: من ينفق عليك يستعبدك !

فقت هاد الصباح كان الجو مضبب وزوين ، مشيت لحانوت عند واحد الحاج سوسي، ظريف وشخصية نقية ومتدين، عندو شوي ديال لحية بيضاء، شارف وعندو تجارب فالحياة، صباح الخير لاباس عليك الخ.. عطيني شي خبز ، مع مشا يعطيني الخبز قلت ليه ايوا الله يجيب شي شتا ،طبعا هدشي بالامازيغية،  قال لي ماتقولش الله يجيب شي شتا ، قول الله يجيب الرحمة، حيث الشتا راه فيها الضرر والنافع،قلت ليه بصح وي عندك الحق الله يرحمنا.. ولكن قلت ليه مع راسي واش هاد سيدي ربي مكلخ ضروري زعما نشرحو ليه بالخشيبات شنو بغينا بضبط؟!! وشكون هذا أصلا للي باغي الشتا تكون مضرة؟ راه أكيد يلا طلبت الشتا راه بغيت الشتا لي نافعة ماشي طوفان نوح ..انا ماشي شجاع نقول ليه هدشي فوجهو لسبب واحد ، هو كناخد عندو بالكريدي حيث مزال ماتخلصت ومقودة عليا..هدشي كيبان بسيط ، ولكن راه مهم بزاف ، الاستقلال المادي ديالك كيخليك تشارك الرأي ديالك بدون حتى شي مشكلة ،ووجهك مرفوع، بينما يلا كنتي تابع لشي حد ماديا ديما كتكون خاضع للرأي ديالو ،وديما هو كايكون مستبد عليك وقاهر ، غير نتا وصاحبك فالعشرة يلا كان كيصرف وخا تكون كطيب بحال شوميشا راه ديما كيكون هو السيد حيث جاب المادة لي غتاكلو وداك الطياب ديالك مامحسوبش غير طلعو ف كرك، ويلا غاتناقشو فشي مسألة مغاديش يحترمك وحتى نتا مغاديش تحترم راسك حيث عارف راسك خايف تقلقو ...هدشي لي وقع لي حتى أنا هاد الصباح وليت فجأة إنسان لا يحترم نفسه حيث ما علنتش الرأي ديالي بسبب جوج دراهم ..جوج دراهم ديال لخبز كانت سبب نخبي الرأي ديالي لراسي...وهذا غير كناخد عندو الكريدي فما بالك يلا كنت أصلا كايصرف عليا راه بدون شك غادي غير يبدا يهضر غانتصنت ونقوليه سمعنا وأطعنا، حتى يلا بغا شي كوية غانعطيها ليه..
هدشي راه كينطبق على المرأة لي كتزوج واحد كيصرف عليها ، وهدشي علاش اغلبية المغاربة باغيين بنت ديال الدوار وخا يتكرفص ويجيب واحد ربعادريال يصرفها عليها ويعيشو العذاب ولكن هانية غير المشكل عندو المرأة ماتكونش عندها الكرامة والكلمة ديالها ،هدشي رعب بالنسبة ليه ،باغيين بنت معندهاش رأي ولا قرار، وأغلبية راه فيه واحد الجانب ديال الطغيان والاستبداد والسلطان كايبغي يمارسو على شي حد كيفما كان ..
هدشي علاش كانقولو خص كل شخص يحاول ما أمكن يعيش بالاستقلال المادي ديالو باش يكون محترم ،ويلا كان معاشر مع شي حد يخلص الواجبات ديالو باش يكون عندو الرأي والقرار فكولشي ماشي غير فالنقاشات،ويلا مكاتصرف مكاتدفعش الفلوس كتكون مجرد عالة بدون كرامة ،وهدشي علاش كنقولو خص البنت والدري يقراو ويترباو مزيان ،وبمجرد يوصلو سن الرشد خص يجريو عليهم والديهوم يتحملو مسؤولياتهم ويصرفو على راسهم ، واليوم راه طبعا مكاينش فرق بين دري وبنت،وأي فرق كاديرو فالتربية بين دري وبنت كون على يقين راه البنت غاتدفع ثمن ديالو غالي ملي تواجه الواقع الحقيقي بعيدا عن الترهات لي كتآمن بها ..
كتقول الكاتبة نوال السعداوي :
المرأة التي لا تنفق على نفسها مثل الدولة التي لا تنفق على نفسها ، قرارها مش بيدها ...
ولكن أكثر الناس لا يعقلون ...