أسرار القطب الجنوبي و نظريات عن عالم مفقود

أوباما فواحد الخطاب غادي يذكر مجتمع الأرض المسطحة فواحد الوقت لي كانو مامعروفينش بزاف...
طبعا كلنا عارفين بلي الخطابات ديال الرؤساء فأمريكا كايكتبوهم ناس مختصين و الذكر ديال الأرض المسطحة من طرف اوباما كان عندو شي سبب واخا بدافع الإستهزاء دار ليهم أكبر إشهار...
مغاديش نهضر على واش الأرض كروية ولا مسطحة حيتاش العلم حسم فهد القضية منذ ألاف السنين ،من فيثاغورت حتى لكاليليو...

لكن أغرب نظرية غادي تسمعها هي أنه مساحة الكرة الأرضية المتعارف عليها اصغر بكثير من المساحة الحقيقية...

سنة 1154 طلب الملك روجر الثاني من الإدريسي باش يرسم ليه خريطة دقيقة للعالم فيها أسماء الشعوب و الدول و التضاريس و المناخ...
غادي يستغرق رسم هد الخريطة سنوات بداية من رحلة قام بيها الإدريسي حول العالم لي إستمرت 15 السنة و غادي يعاونو 12 رحالة فرسم هد الخريطة الدقيقة...
الخريطة كانت مقلوبة و إفريقيا كاتشوف لفوق و رسمها كبيرة فالمساحة و شادة نصف الكرة الأرضية مقارنة بأسيا و أوروبا لكن الغريب فالأمر هو فمكان القطب الشمالي كتب ياجوج وماجوج و أسفله حدد مكان إسمه الوقواق و بزاف الجزر لي إختفت من الوجود في الخرائط ديال اليوم...
الإدريسي كان إنسان صادق و جدي فالعمل ديالو و ماشي غير جا الملك روجر و طلب منو هو بظبط يصور ليه هديك الخريطة...
كايبقى السؤال المطروح واش بصح كاينين جزر ختفات و واش بصح كاين أرض سميتها الوقواق و واش بصح كاين أرض يجوج وماجوج في القطب الشمالي ولا غير الإدريسي ستمدها من الرواية الدينية...

مور هد الخريطة الغريبة ب 400 سنة تقريبا غادي يرسم واحد الرحالة تركي سميتو بيري ريس خريطة ديالو بضبط سنة 1513 م لي إعتامد فيها على الرحلات ديالو و على خرائط قديمة...

هد الخريطة تعد أكثر الخرائط غرابة في التاريخ أولا لي ذكرها القارة الأمريكية قبل إكتشافها لكن الأغرب هو تواجد القارة القطبية الجنوبية أيضا قبل الإكتشاف ديالها و فيها أثر الحياة مع اسماء المدن و التضاريس و رسم المناطق على أساس أنها خالية من الجليد...
و رسمها كبيرة بزاف و شادة جنوب الكرة الارضية كامل...
غادي نخلي خريطة تصويرية من الخريطة ديالو لي لقاو منها غير أجزاء للأسف...

واحد الادميرال امريكي سميتو ريتشارد بيرد كان مكلف بإستكشاف القطب الجنوبي والشمالي ما بين سنة 1928 و 1957...
هذ السيد كتب واحد المذكرات و قال فيهم شي امور غريبة مثلا قالهم بلي خريطة القطب الشمالي ماشي هي لي كانشوفو فالخرائط العادية و بلي كاين جبل عظيم أسود وسط اربع جزر ضخمة و فهذاك الجبل كاين مدينة عمرو شاف بحالها من  العظمة و الجمال لي فيها وقال بلي عندها السكان ديالها و لي سيطروليه على الطائرة ديالو و نزلوه عندهم وكلا و شرب معاهم و هضرو معاه على بزاف الأمور و قال بلي عندهم علم و معرفة كبيرة...
ومين جا الوقت باش يمشي عطاوه الطائرة ديالو...
فالرحلة الثانية لي دار للقطب الجنوبي سنة 1928...
قال بلي القطب الجنوبي محاط بجدار جليدي عظيم...
قال بلي كنت كنعطي هذ التقارير لرئيس الأمريكي فرانكلن روزفلت و هينري فورد مؤسس الفورد و جون روكفيلر...
فرحلة الثانية سنة 1934 ݣلس بيرد أكثر من 5 أشهر و كايقولو تما تفربل شوية...
هذ السيد عندو مقابلة فالتلفاز كايقول فيها بلي لقى اراضي كبيرة فيها مناخ معتدل مور الثلج و قال بلي العالم لي كنعرفو اليوم تقلص الحجم ديالو...

فسروها بلي قصد بيها الإكتشاف ديالو لعالم أكبر من هذ العالم  لي كنعرفو (المقابلة كاينة في يوتيب)

فالمذكرات قال بلي هذ الأرض عندها السكان ديالها و أنها عالم مثالي فيه كلشي جميل و الناس ديالو عايشين في سلام...
هذ الهضرة كتشبه لأسطورة مدينة أغارثا و أرض شمبالا لي كاينين في المعتقد البوذي و هذ شي لي قالو ريتشارد كلو مذكور عندهم...
غير باش نكونو متفاهمين ريشارد مقال حتى حاجة من هذ شي فالحياة ديالو من غير المقابلة التلفزيونية لي هضر على أراضي شاسعة وراء القطب الجنوبي...
 ولكن العائلة ديالو خرجو هذ المذكرات سنة 1975 من بعد ما مات و فيها هذ القصص الغريبة...
واش خونا تفربل قبل ما يموت و بقى يتخيل، واش كان يكتب رواية خيالية ،واش الاهل ديالو بغاو يدخلو صريف من هذ القصة لي كاتبان خيالية ،الله أعلم حتى واحد ما عارف...
لكن فيها تفاصيل مملة و الوصف دقيق لهذ العالم الخيالي و ممزوجة بأحداث لي عاصرها هو تما...
كاينة واحد العملية مؤرخة دارتها ميريكان سميتها عملية الوثب العالي فنهاية الحرب العالمية الثانية ،خدات 68 فرقة و 4700 رجل و 13 السفينة و 33  طائرة حربية...
الامريكان كايقولو غير مشاو يستكشفو القطب الجنوبي لكن مذكرات ريشارد كاتقول بلي مشاو يقلبو على هتلر والفريق ديالو ، حيتاش مايمكنش ݣاع هذ العتاد غادي يمشيو على مهمة إستكشافية...
كاين مجموعة من العمليات اخرى سميتهم عمليات العمق المجمد 1 ،2 ،3 حتى هوما مؤرخ لهم طبعا و كان مشارك فيهم ريشارد...
خدات أمريكا 43 فرطقة و مقاتلة بحرية و كاسحة الثلوج و الاف الجنود و طائرات حربية ،كايقولو انها زيارات إستكشافية علمية لكن مذكرات ريشارد كاتقول بلي كانت عمليات إبادة ،ديالمن الله و اعلم...

واحد الروسي سميتو ليوند إيفاشوف شغل مناصب عسكرية حساسة في الإتحاد السفياتي و كان عندو رتبة كولونيل... 
مؤخرا غادي يخرج واحد الكتاب للعلن سميتو عالم مقلوب هد الكتاب عامر بالوثائق السرية ديال الإتحاد السفياتي...
سنة 1991 تم السماح لهد الناس لي بقاو عندهم هدوك الوثائق في التصرف فيهم و هنا خونا قرر يخرج هد الكتاب للعلن...
الكتاب كايبدى بوثائق إستجواب ديال واحد الجاسوس روسي سميتو بلومكين تعرض للإعدام حيتاش باع معلومات سرية لألمانيا و اليابان...
فهد الحوار كايقول الجاسوس بلي مشى فمهمة سرية باش يلقى مدينة الألهة...
و فعلا لقاها فتبت و شاف فيها أسحلة غريبة و تقنيات عالية مزال ما وصل ليهم الإنسان...
الكتاب فيه وثائق كاتهضر على مراقبة ديال غواصات ألمانية كاتمشي للقطب الجنوبي محملة بالناس و كاترجع فارغة ، الإتحاد السفياتي غادي يقرر يرسل بعثة باش يشوف فين كايمشيو هد الناس و حسب هد الوثائق تم إكتشاف مدينة أسسها هيتلر فهد الأراضي و سماوها نيو برلين كان فيها 2 مليون نازي...
الكاتب ذكر أيضا بزاف الحوادث ديال لقاء السفيات  الأطباق الطائرة فهد المناطق و قال بلي هد الناس مسالمين و الهدف هو غير يخوفوهم باش يبعدو من الارض ديالهم...
أيضا كايقول بلي سكان هدوك الأراضي مابغاوش لا أمريكان و لا سفيات ولا المان يجيو عندهم...
طبعا هد شي مكايتقبلوش العقل لكن الحقيقة هي أنه أمريكا و الإتحاد السوفياتي و ألمانيا النازية كاتاشفو شي حاجة مور القطب الجنوبي و للأسف عمر ما غادي نعرفوها على الأقل في عصرنا...