بوتفادين يسخر من الذين يبخسون نجاحات النساء عبر العالم من منطلق قبلي

واحد السيد فواحد التعليق قال لي عطيني إسم امرأة  ناجحة ،وبلا ماتقول لي الرئيسة الألمانية ميركل حيث غانضحك عليك ، !! معرفتش علاش غايضحك عليا؟ ..واش حيث ميركل مشهورة بزاف وكولشي عارفها فالعالم وبالتاالي راه ماشي دليل واضح بلي المرأة ناجحة وتصلح لقيادة الدول ..صافي  ارا شي اسم اخر ههه؟
شوف غير بعدا طبيعة السؤال ديالو  ...عطيني اسم امرأة ناجحة، هكا بلا حشمة بلا حيا لله العجب ..!! بنادم كياخد العيالات ديال الدوار ديالو لي مقهورين ومادارو  تا وزة فحياتهم هوما المعيار ديال نساء العالم كولو ...صافي النجاح غير ديال الذكور خص النساء يجبدو واحد الاسم باش يبرهنو بيه بلي هوما ناجحات ولا راه واحد من جنوب المغرب غياخد عليهم نظرة خايبة  ...أسيرو تحشمو باركا من تكريس ثقافة التمييز والعنصرية، واش اصاحبي المرا حصلات على جوج جوائز نوبل فجوج تخصصات علمية مختلفة كاع مكاين لي دارها، وكتشفات جوج عناصر كيميائية ،والأبحاث ديالها عندها دور كبير فتطوير تقنيات العلاج الإشعاعي وتقدم الطب النووي الحديث، لي كيخدمو بها فعلاج الأمراض السرطانية ...
وكذلك إيلا سمعنا   باكتشاف عملية الانشطار النووي راه وراءه اسم كبير ديال عالمة ألمانية...وهادشي مجرد أمثلة وكاين المئاااات فالطب والفيزياء والرياضيات والإنسانيات...ومزال بنادم حال فمو وكيقول بلي عقل الرجل افضل من عقل المرأة....باش؟ يلاه عطيني سبب ؟
ياك أرقى جائزة رياضيات فالعالم حصلات عليها امرأة إيرانية؟ شنو درتي نتا لي عندك خصيتين وعضلات؟
ومن هدشي كولو  يا أخي يلا كايحسب لك بلي النجاح هو ممارسة السياسة ، راه  مستشارة ألمانيا  ميركل ماشي غير هي للي كاينا فالسياسة  ، راه ميركل مشهورة غير حيث تم انتخاباها مرارا، واغلب الألمان كيصوت عليها ، ومشهورة حيث حكمات سبعطاش سنة  ...
أما راه كثر من مائة وأربعين امرأة حكمو دول ولا ترأسوا حكومات ...من غير  آلاف المناصب ديال الشركات والبنوك والوزارات وكراسي الجامعات لي كيتطلبو مجهود عقلي جبار وحس مسؤولية كبيرة جدا ....
طبعا هدشي كولو والذكورية والتمييز والعنصرية متجذرة فأروبا حتى للثمانينات،سواء فمجال التعليم وفرص العمل والمشاركة وكولشي ، راه ففرنسا مثلا ف ألف وتسعمية وخمسين عاد وللى  من حق المرأة تلوح الورقة وتصوت على من بغات، تخيل معايا ...وبعد عشر سنين عاد ولى من حقها تترشح للانتخابات ...ولكن بنادم هبيل كايجي مثلا يدير لك مقارنات بين إنجاز الرجل فالعلوم والمشاركة  فبدايات القرن العشرين حتى لدبا ،وهي راه المرأة ماعندهاش القيمة كمواطن  عند الدولة حتى لمنتصف القرن العشرين وبعده ...هدشي عند الدولة والمؤسسات خلي عليك نظرة ديال المجتمعات للي كايعيشو فيها ...
ومع ذلك كولو راه  النساء كانو قادة دول قبل حتى ما تجي نتا للوجود...شوف غير نتا واش غاتنجح فشي حاجة فحياتك يا ذا الخصيتين... 
رئيسة وزارة بريطانيا  مارغريت تاتش من عام تسعود وسبعين حتى لبداية التسعين ...
رئيسة حكومة الهند حضاش سنة ،شي وحدة سمينها غاندي فالنسب ...
وكاينا الرئيسة الرابعة لدولة لإسلندا  معقلتش على سميتها ،حكمات ستة عشر سنة...
جمهورية ايرلندا  حكماتها امرأة ربعطاش عام ...
دولة فنلندا حكماتها امرأة طناعش سنة ..وكذلك النرويج كنظن ماشي غير وحدة حكماتو ..
هادو غير أطول فترات حكم ، أما لي حكمو ولاية واحدة ولا جوج راه ما أكثرهم ..هذا يلا كتعتبر السياسة هي النجاح، ؟مافهمتش بنادم شمن دليل باغي مزال باش يدخل لدماغو بللي الفرق البيولوجي بين الجنسين مكايعنيش انه هو  الأفضل غير حيث عندو خصيتين وعضلات ؟