بوتفادين : المجتمع المغربي متصالح مع عهر الرجل و يعتبره مجدا

تخيل دبا النساء ديال قطر والإمارات يوليو يطلبو من الرجال المغاربة يجيو عندهم ويخلصوهوم باش يكويوهوم؟... 
وخا هدشي نيت راه كاين ولكن ماباينش بزاف ومخبي ..
تخيل كون كانت هاد القضية ، راه كاع المغاربة لي كيتغناو بالاخلاق والمبادئ والكرامة غايهزو الباليزا...
ولكن المشكل هو غايشوفو بلي أي واحد طايح على خليجية كطهلا فيه راها همزة ومغاديش يعتبروه عاهر.. وإنما سيد ذكي طاح على دجاجة بكمونها... 
تخيل معي الحكم الأخلاقي غادي يتغير رأسا على عقب غير حيث هو ذكر ...دكشي علاش فالمغرب  دبا لبنت لي طايحة على شارف كيصرف عليها كايسميوها عاهرة ماطيرياليست ...بينما الدري يلا طاح على وحدة شارفة كتصرف عليه ومكايدير والو من غير الجنس كيولي هو ذكي ومبهر وقدوة ديال الشباب وغادي يعاودها لصحابو بحال شي بطل ديال مصارعة ...بينما درية خص تكون على بال مايسيق ليها شي حد لخبار حيث مغديش تبقى صالحة ودكشي لي غادير لا يغتفر بينما الشاب الماضي ديالو يمكن يتمسح ف طرفة عين....
راه المشكل ديال المغاربة كاين مع المرأة ماشي مع القحوب ولا الفساد ولا سوء الاخلاق، حيث هدشي كولو غارقين فيه..  وباش تأكدوا من هادشي ، راه حتى قضية الزواج كاع لي هي شرعية وقانونية كايشوفو أنه ماخص البنت تزوج خليجي ولا مصري ولا فرنسي ، كايشوفو أي بنت مغربية تزوجات براني راها صافي طماعة ومقحبنة وموجدين ليها كاع الألقاب ديالها...بينما الدري يتزوج لي بغا مكاينش لي يهضر معه ... بالعكس الله يسهل عليه راه عندو زهر .. 

المشكل ديال المغاربة أنهم بغاو يديرو بزاف ديال الحوايج فحياتهوم ومابغينش حتى شي حد يتدخل فيهم وكيعتبرو راسهم أحرار ،بينما المرأة كيعتبروها ملكية خاصة ديالهم ،وخاص يعرفو شنو كادير ،وشنو لي خص دير ،وللي ما خص دير ، وخص المرأة تبقى متحكم فيها حيث القيم الأخلاقية كلها غادي تنزل للحضيض يلا كانت المرأة حرة...

مزال ماباغينش المغاربة يفهمو ويهضمو بلي داك عصر المرابطين لي مزال عايشين فيهم بعقولهوم ومخدرين بيه راه مشا هادي ألف عام  ،فيقو معنا فيقو راه وصلنا القرن الواحد والعشرين...
ديك الهضرة ديال وحدة عاهرة فالخليج كتشوه صورة ديال البلاد راه هضرة خاوية بزاف ، حيث خص المجتمع يفهم بلي حنا مابقيناش فداك العصر ديال الجاهلية ، لي دار شي حاجة خايبة كاتحمل معه القبيلة ديالو نفس السبة والمعيور  .... بنادم من نيتو كايقولك المغربيات كايشوهو بينا...اتشوف اللوجيك ،تحررو شويا من هاد الأثقال لي معقدة ليكم حياتكم راه غير غاتمرضو...
هذا عصر ديال استقلال الأشخاص والأفراد  ،ماشي بحال شحال هادي، دبا كل واحد عندو كارط ناسيونال تاعو ، وكل واحد عندو هوية ديالو ..وكل واحد كيمثل راسو ..وكل واحد كيتحمل المسؤولية ديال الأعمال ديالو ...
وااااداابا غير بالعقل ... وحدة فقطر هازة رجليها وكتربح صرف ،وأنا مقلق ماعجبنيش الحال ف جماعة أيت زينب فورزازات، راه قمة اللامنطق وقمة البلاهة والحمق والغفلة...