"إدعاء المثالية " و زيف السلوكات سبب من أسباب فشل العلاقات العاطفية و الزوجية؟

شحال من واحد كيقولك فلان تبدل عليا، ولا علاش بنادم كيتبدل ، ولا شحال من واحد كيتزوج ،ومن بعد الزواج مباشرة كيوقع انقلاب وكيتصدم من الشريك ديالو...
فالحقيقة راه صعيب يتبدل بنادم يلا مكانوش شي ظروف بدلاتو بحال الفلوس مثلا  ولا شي تطور كبير فالحالة الاجتماعية ديال داك الشخص...
ولكن الاغلبية لي كانسميهوم كيتبدلو راه غير كنغلطو فيهم ،حيث داك الشخص لي تبدل عليك ،راه غير كان كيوريك واحد الشخصية ،وواحد الوجه ،وكيمثل عليك واحد الوقت لغرض معين، ولشي هدف مقصود، وملي كادوز واحد الوقت وكتعاشرو وتقاسم معه لحظاتك وأيامك، صافي كيكون صعيب عليه مزال يشد فداك الماسك، وغايعيا يمثل داك الدور للي ماشي ديالو ، وغايعيا كل نهار يكون مهرج على خشبة مسرح ..حيث التثميل عندو وقت وعندو حد ، راه غايمثل على بنادم فالفيس والنمرة وحتى بعض الخرجات واللقاءات ،ولكن راه كاتوصل واحد الفترة صافي غاايستسلم وغايتصرف بطبيعتو الاصلية ،وغادي يضطر يكون على السلوك الحقيقي ديالو ،وغادي يبانو الاخلاق  لي تربى عليها ،وغادي يبانو العقد النفسية لي كانو مركبين فيه من الصغر من طرف باه ومو والمحيط وحتى الدين،وكذلك غادي توضح الشخصية ديالو لي صنعها لراسو  ..ملي كيوقع هدشي صافي نتا بحال يلا كتصدم ولا كتفاجئ من داك التغيير وربما كيآذيك ..
لذلك من الأفضل ليك ولغيرك تصرف كيفما نتا وماتكلفش وماتمثلش ،باش حتى لي بغاك الشخص ولا لي عاشرك وفيك شي حوايج خايبين حيث كلنا فينا عيوب ، داك الشخص كايربي واحد المناعة معك وكيتأضابطا مع العيوب ديالك ولا كيرفضها من الاول وتكونو بجوكم مهنيين ...ربيو راسكم على الصدق والوضوح وأغرااااس ، راه الاشياء لي غاتخسرو بالكذوب والتمثيل راه كبيرة بزاف مقارنة مع الحوايج لي غاتخسرو يلا كنتو صادقين ،  أي حاجة قولها كيفما هي ماتزيد ماتنقص باش ترتاح ،يلا مكنتيش ظريف ماتمثلش عليها ولا عليه الظرافات، يلا كنتي مكتفهمش فشي ضومين ماديرش فيها فيلسوف علامة ، من ناحية الدين يلا مكنتيش متدين ماديرش فيها الحسن البصري باش تاكل لها الدماغ ..كنتي مقادرش تواجه وتقاتل مكاين لاش تمثل عليها بلي راك قوي وكذا،  ويلا كنتي كتعصب ولا كسول ولا مريض فكرك ،ولا عندك بحال عقلية جدودنا الخانزين راه عااادي يلا تصرفتي بحالهم وبعفوية ..عرفتي حتى قدراتك الجنسية الفاشلة ،ولا يلا كتظن عندك القذف السريع مثلا بحالي انا ، راه من الواجب ديالك  تقول للشريك ديالك هدشي ، ماشي تبقى تسرحها فالخيال الجنسي وتقوليها نتا جوني وتقوليها عندي قضيب كبير وكاع دوك الأوهام على الفحولة،  وفلخر تلقاك غير ثلاجة ...
بهاد الطريقة من الناحية العقلانية كنظن تقدر علاقاتك تنجح  ...والله أعلم ، ولكن حتى الله محال واش يعرف..