أثر الرفض على النفس يعادل ألم الاحتراق الجسدي !

#شوية_البسيكولوجي :
#الشعور_بالرفض :
-------------------------------------------------------------
الإنسان كائن اجتماعي كيحس بالأمان وسط الناس ودعمهم ، أي شعور بالرفض ولو بسيط  سوا ف الخدمة أو من حبيب أو من الأصدقاء أو حتى من الأهل ممكن يسبب توتر أو قلق أو حتى صدمات بدرجاتها  المختلفة .
صحابك ملي كيمشيو السينما بلا خبارك ،حبيبك ملي كيقرر ينهي العلاقة ،مديرك ملي مكيبقاش يتواصل معاك ، زملاء العمل ملي كيحتفلوا بشي مناسبة وكيتجاهلوا دعوتك ، عائلتك ملي كيميزو خوتك عليك ،أو ينبذوك حيت قررتي تولي مختلف مثلا . العلماء من هادي عشرين سنة دارو بزاف د الأبحاث واكتشفوا أن الألم الشديد اللي كيحس بيه الإنسان بسبب الرفض كينشط نفس خلايا المخ اللي كتنشط ايلا تكفح على يديك قهوة مغلية، تخيل ..مغلية  نعاماس.
ومن أحد التفسيرات التطورية لهاد الألم الشديد أنه الإنسان القديم كان أقصى عقوبة ممكن يتلقاها هي ''النفي خارج القبيلة'' وبالتالي جيناتنا خزنات مدى أهمية القرب والقبول وخزنات خوف شديد من الرفض والهجر.
الشعور بالرفض كيولد مشاعر داخلية ومشاعر خارجية :
المشاعر الداخلية كتتمثل ف فقدان الثقة بالنفس والشعور بالذنب وصولا  لاحتقار الذات وتدمير ذاتي للذات اللي أصلا هشة.
المشاعر الخارجية كتتمثل ف العنف الشديد وانخفاض التركيز وانخفاض منسوب الذكاء ،تخيل ذكاءك كيقل ملي كتحس بالرفض. 
العلماء لقاو أن العنف الناتج من رفض زملاء الدراسة أو المدرسين ممكن يولد عند المراهق عنف أشد من عنف المدمنين وعنف المنتمين لعصابات منظمة ،حوادث قتل عشوائي وقعات بزاف وكان وراها الشعور بالرفض للأسف .
منقدرش نحدد ليك أي أنواع الرفض أشد ألما ،الرفض الاجتماعي ولا الوظيفي ولا الرومانسي لكن المؤكد أن ضعف الثقة بالنفس من الأصل كيزيد الشعور بالألم . 
ألم الرفض ما يمكنش تتفاداه حيت هو واقع وغيوقع هادي هي سنة الحياة ، لكن ماشي شرط يستمر .
من أشهر طرق العلاج من بعد تدعيم الثقة بالنفس هو أن المعالج كيتفق على مدة حزن محددة بالأيام والساعات ، اييه ياسيدي غنبيكو  ونحزنو فيها ولكن من بعد هادشي غنتوكدو ونكملو ، من حقك تحزن ومن حقك تفرح من بعد
تفكر إنجازاتك، تفكر طيبتك وعطاءك ،تفكر إعجاب الناس لاخرين من غير هدوك اللي رفضوك ،تفكر حب الناس ليك ، اللي بغاوك ف مشوار حياتك .
وتفكر جوج حوايج أن السبب الرئيسي للرفض ( الرومانسي أو ديال الصحاب ) ماشي معناه أنك خايب، لا  معناه أنه هاد الشخص ماشي مناسب أو اللحظة ماشي  مناسبة. 
وتفكر أن  حق الرفض مكفول ليك بحال ماهو مكفول للي رفضك، ولكن عنداك تقرر ترفض كاع الناس باش تنتقم من نفسك أو من الناس  
-----------------------------------------------------
وكلمة اخيرة ،كل رفض ممكن نبرروه للشخص ونقدرو نقولو أنه هدا حق من حقوقو ،إلا رفض الأبوين للأبناء ف الصغر تحديدا ،جريمة لا تغتفر .