هل المرأة ناقصة عقل ؟ مقاربة بين العلم و الدين

المرأة ناقصة عقل .. حديث صحيح 

( بغض النظر على دوك التأويلات الركيكة الواهية والهزلية لي كيطلقها بعض الشيوخ والمؤثرين فمواقع التواصل وكيقولو ليك بلي الرسول صلى الله عليه وسلم راه ماقصدش بالضبط يقول بلي عقل المرأة ناقص نيييت ..وإنما كيقصد أن عاطفة المرأة كتحكم فيها وكذا وكذا.. الخ..الخ..  من التخربيقات  للي الهدف منها هو تبرئة النص الديني من شبهة الانتقاص من المرأة.....
ولكن راه الحديث قالك أسى بالحرف راه عقل المرأة ناقص ..علاش مايقولش لك نيت بشي عبارة أخرى واضحة راه العاطفة هي لي كتحكم فيها..واش بغيتو تقولو بلي الرسول محمد ماعندوش مع فن التعبير والانشاء وانتقاء المفردات الملائمة والمناسبة باش يقول لينا دكشي لي بغا يقول مباشرة من دون استعمال عبارات كتحتاج منا تفسير وتأويل ؟
وعلاش اصلا هاد القرآن والحديث بالسلامة غايكون فيه التأويل؟..مافهمتش اصاحبي انا واحد الإله نزل واحد النص ويعمرو بالالغاز واش باغي يفهمنا واحد الميساج ولا يعلب معنا ألعاب العقل؟
راه للي كيقول القرآن والحديث كيحتمل التأويل ،ولا كيقول واحد العبارة وكيقصد حاجة خرى، راه كايعترف ضمنيا بلي سيدي ربي مسالي قبو  وكيلعب...
ومن غير هاد الحديث كاع ديال المرأة ناقصة عقل،راه كاينين أحاديث اخرى لي فيها نقصان عقل المرأة مباشرة ،مثلا للي مكاتجوز شهادة  المرأة في الزواج، وقضايا الارث وكاع الاشياء لي فيها المشاكل  ... دبا نقولو لنفترض مثلا ماقبلتيش شهادة امرأة فواحد الموضوع كيتعلق بشي مجرم حيث محتمل أنه غادي تحن عليه حيث عاطفية (وخا هدشي خرافة حيث العالم كولو دبا فيه قاضيات مشهود لهن بالكفاءة فالعمل ديالهم وماشي غير فالقضاء حتى الاقتصاد والادارة لي كيتطلبو مهارة وذكاء وعقل متوقد.....)
ولكن شنو محل رفض شهادة المرأة فالزواج ؟...
وحدة شهدات لشي وحدة على زواج فهو زواج باطل شرعا .. علاش باطل مافهمتش؟  حديث واضح فيه لا تزوج المرأة المرأة ولا تزوج المرأة  نفسها وقال ابو هريرة فإن الزانية هي التي تزوج نفسها...إربي واش هادي دبا هضرة هههههههه؟
ولنفترض كاع مشينا معكم فهاد الخط وقلنا لكم اه راه الرسول فعلا كيقصد العاطفة...ولكن شنو نديرو  مع النص القرآني للي واضح كاع بزاف وحسم فهاد المسألة ديال نقصان عقل المرأة ...وللي كيصرح نيشان بدون التواء ،إيلا جوج عيالات  مشاو يعطيو شهادة قدام القاضي (طبعا شهادة المرأة محصورة فبعض القضايا فقط)..ويلا شهدات وحدة فيهم راه محتمل أنها تنسى شي حاجة ولا تغافل على شي معلومة، وهدشي علاش لابد شي وحدة تفكرها وتقوي الشهادة ديالها باش يلاه نحصلو على شهادة كاملة ديال رجل واحد ....
إيوا شوف معايا قمة استغفال المرأة واستهبالها.. النص القرآني واضح جدا وهو أن العقل النسائي كيعاني من نقص فالذاكرة ولا واحد النوع من الزهايمر ولا شي حاجة بحل هاكاك ، مع العلم  أن الدراسات العلمية الحديثة وقريت نيت مقالات على هدشي ،وخلاصتها إلى أن ذاكرة المرأة في مايتعلق بتذكر الاشياء والأشخاص والوجوه اقوى من ذاكرة الرجل ..
وحتى الفقهاء والمفسرين اللغويين الاوائل لي مكانظنش نتوما حسن منهم فطريقة العرب فالكلام، واسرار اللغة والبلاغة حتى واحد فيهم مافسر الحديث والآية بداك التأويل الغريب ديال العاطفة ،كيقولو ليك نيشان المرأة نص عقل حيث مخايفينش بحالكم من الحركات النسوية...
وحتى فقهاء المذاهب بحال الشافعي لي دوز عشر سنين من حياتو غير فالبادية غير باش يتعلم العربية وخا هو عربي ماقالش داك التفسير... ويلا طالعتي على كتاب الفقه ديالو للي سماه (الأم )وهو من أقدم الكتب العربية القديمة غتلقا مباشرة بلي المرأة نصف عقل ..  والتاريخ الإسلامي لي كيمتد  طوال قرون كايتمشى بهدشي، المرأة نص عقل...
ومابان ليهم يقولو الرسول ماقصدش دكشي حتى الفترة للي ظهرات فيها الحركة النسوية بقوة فأروبا فالقرن التاسع عشر ووقفات ضد النصوص الدينية والفلسفية لي كتنتاقص من قيمة عقل المرأة.. كيفما ظهرو عدد من التأويلات العبيطة الأخرى فالعالم الإسلامي لي كتحاول تجدد الإسلام  باش يوالم العصر فكل القضايا السياسيه والاقتصادية.....
بحال يلا جبتي واحد الشمعة قدام البولا وكتفلسف علينا راه الشمعة بحال البولا غير خص تفهمو مزيان بلي الشمعة ماااكتقصدش تطفى بزربة ويكون الضوء ديالها قليل ولكن بلا بلا بلا بلا ...المهم هو الشمعة مابقاتش صالحة صااافي ... 

وبرا هد الهضرة كولها، أصلا راه  هدشي ديال نقصان عقل المرأة أصلا راه معتقد معروف فالزمن القديم وماشي شي حاجة شاذة وغريبة جا بها الإسلام بوحدو ،راه قبل الإسلام كاينا اليهودية والمسيحية للي كيقولو نفس الهضرة غير كيتوارثو هدشي...وحتى قبل الأديان الابراهيمية راه كنظن بلي هاد الفكرة الرعناء على المرأة راه أول من أطلقها هو الفيلسوف اليوناني ارسطوا وتأثر بيه أفلاطون والعالم كامل والاديان السماوية كاع دكشي لي فيها سبقو له الفلاسفة ديال اليونان ومصر القديمة....ضونك علاش كتفلسفو وكتأولو بزاف ؟