لماذا تشعر بالغثيان أثناء السفر؟..العلم يجيبك

#علاش_كتحس_بالدوخة_و_التقيا_فاش_كتسافر?? 

تتكون راكب فالطموبيل مسافر لشي بلاصة و واحد شوية كتحس بالدوخة و بحالا بغيتي تقيا، مهم بلا ما تخاف، حيت هادي إشارة أن دماغك تيخدم بشكل صحيح (نوعا ما) ، و التقيا تيكون نتيجة استجابة دماغك لمحاولة تسميمك، كيفاش؟
دابا أنت أسيدي فاش كتكون راكب فالطموبيل فأنت علميا حمولة، ثابت فبلاصتك متتحركش و لكن فنفس الوقت دماغك عارف أنك تتحرك بواحد السرعة للقدام، و السبب تيكون على مستوى جهاز التوازن فالجسم ديالنا، يعني الأذن الداخلية ديالنا تيكون فيها أنابيب تيكون فيها سائل، هاد السائل تيتحرك و هنا تيبين لدماغك أنك تتحرك و لكن فالواقع أنت ثابت فبلاصتك و هادشي لي تيخلي يوصل للدماغ  رسائل مخربقة  تيحاول يجمعها و يفهم بالضبط آش واقع و لكن فالأخير تيفسرها بأنه وقع ليك تسمم، و كرد فعل تتقيا، يعني فهاد الحالة دماغك تيوقع ليه بحال  اضطراب، و ما كاين لا تسمم لا هم يحزنون.
و باش تحاول تفادى هاذ المشكل ما عليك غير تبقا تشوف فشرجم طموبيل حيت هنا دماغك تيطمن و تيقتانع أنه فعلا تيتحرك، أما إلا جربتي تقرا كتاب فغاد يوقع العكس.
دابا الحاجة اللي باقا محيرة العلماء هي علاش تتوقع عند بعض الناس، و بعض الآخر لا؟