عبدو بوتفادين: الرجل هو المستفيد الأكبر من الزواج التقليدي و لهذه الأسباب يرفض مدونة الأسرة!

قبيلا درت واحد الديسك أمازيغي ديال مبارك أيسار، فيه طناعش دقيقة ، من خلال هاد المدة نصبت الكوتوت وغسلت مواعن العشاء والفطور  ..
تخيل على قبل هدشي باغي بنادم يتزوج فتاة عاطلة عن العمل باش دير ليه هدشي ، قمة الأنانية والغباء , بنادم عارف بلي راه دكشي لي محتاج ياكلو يلا كان بوحدو هو نيت باش غايعيش هو ومرتو، هذا يلا مكانش قل حيث يلا كان بنادم عازب مكيحسبش بزاف دكشي علاش الرجل مسلكو يتزوج نوعا ما ..ولكن خصو غير يلقا واحد البنت صبارة على هاد الهبال ،زعما تبغي غير تاكل وتخرا صافي، حيث هدشي لي مسلكو ..هدشي علاش الرجل كيقلب على بنت بحال مو ماباااغا والو من غير ماكلة  ..
الزواج التقليدي أكبر واحد كايستفد فيه هو الرجل ، حيث هو من واحد الناحية راه كايكمل حيااتو العملية وينجح ويحقق مكاسب مادية وثقافية ويقدر يطور راسو ، وفي نفس الوقت ها هو خلق الاسرة وأبناء وجاب واحد الخدامة فابور للدار طيب ليه وتاكل ، ومن الفوق كايحسب ليه داير الخير فيها، راه الحمار يلا جبتيه لدار غتوكلو فالنهار كثر من دكشي لي غتاكل ليك المرا، ولكن هدشي حيث محتاج  الحمار....
وكاين كاع  لي خطير  من الرجال كيتزوج هاد البنت حتى يطور راسو ويطلقها وما أكثرهم، هدشي خصوصا فعصر جدودنا الخانزين ملي مكانش هاد القانون ..دكشي علاش بنادم دبا كيبكي بزاف حيث القانون حيد ليه داك الهبال لي مسلكو وقالك النسوية خرجات علينا ..
الذكر المغربي ناقص العقل، كيفترض من الأساس بأنه المرأة معندهاش شخصية ولا تكون إنسان بحالو تاهي عندها مسار واهداف فالحياة وإنجاز خص ديرو وتنفع راسها وتنفع الدولة..الذكر المغربي كايشوف بلي المرأة الهدف ديالها كاع من الوجود كولو ،هو تولي أم  وتولد وطيب ،بينما هو راه ممكن يولي أب وفنفس الوقت تكون عندو حياة أخرى واهتمامات خارج المنزل ..
المغربي أناني بزاف لدرجة لا تصور ،  وأكبر تجليات هاد الأنانية ملي كيبغي يتزوج باغي بنت ماخداماش ،ولكن ملي يولد بنت كيقريها وضروري تخدم ويلا غتخلي خدمة على قبل رجل آخر مكيخليهاش ...
وخا بنادم كيقنع الناس بديك الهضرة الخاوية ديال المرا خص تربي لولاد راه هدشي مجرد غطاء كيغطي القبح والأنانية ديالو ...
علاه التربية هي تولد لولاد وتزيد ليهم سوايع وحصص فالتربية ؟ راه التربية بسيطة جدا ، هي واحد المجموع من السلوك والأخلاق يلا كانو فيك نتا، وف مراتك ،وفالمحيط لي عايش فيه ،راه غايتحولو مباشرة للطفل ...راه التربية ماشي ملي كتولد كتبدا تقول لولدك راه السرقة حرام ...وإنما التربية هي يلقاك ولدك ماشي سارق..التربية ماشي تقول لولدك بالشفوي راه الكذب، والغدر ،والخيانة ،وإهانة الآخرين خايبة وخصك سوايع على هدشي باش تكلس الأم فالدار،إنما خصو يلقاك كأب وكأم مافيكومش هد الخصال القبيحة ...بنادم مشا غالط وكيحسب ليه راه الأم للي كتكلس فدار وتولي ربة بيت راه غاتربي الأبناء ، والواقع راه كانشوفو السجون عامرين غير بولاد ربات البيوت  وأبناء الفقراء،.. وماعمرك تلقا ولد موظفة كابر فبيئة نقية ومامربيش، مع العلم انه ممكن تلقاه  حيث كاينين إستثناءات...
خلاصة القول راه يلا خدمتي نتا وخدمات مراتك كاين احتمال غاتعيش حياة فيها نوع من الكرامة والرفاهية ، بينما نتا يلا خدام بوحدك ،وتزوجتي واحد الكائن مستهلك مكينتج والو ، من غير يمارس الجنس ويغسل المواعن وحتى الدولة مكاتستفد معها والو وكتولي مجرد رقم زائد،راه كاين احتمال تقودها على راسك وعليها حيث داك الكائن لي كتصرف عليه محتاج اشياء اخرى من غير الخبز والزيت والثوم والبصل ونتا غيتزادو عليك وغاتعيشو واحد الحياة ديال النمل ، وحاول شوي تكون واقعي حيث نتا وخا تقرا وطير تا تعيا غاتشد خمسلاف درهم ويلله غاتغطي بها المصاريف الضرورية ، ونتا باغي الرفاهية والكرامة...فما بالك يلا كتشد قل ، إيوا لا تتزوج موظفة ... ولكن هاد الهضرة كنقولها حتى لديك لي خدامة ومتزوجة وفي نفس الوقت ذكية وماكرة بزاف لدرجة انه كتجمع فلوسها وتخلي الزوج يدابز مع مصاريف الحياة ويهز المسؤولية بوحدو بحجة الرجل هو المنفق قانونيا،  هاد النوع بالضبط يوم القيامة غايشدها سيدي ربي وغايخشي ليها مسمار فمؤخرتها ويخرجو من الفم ويديرها فوق الشواية ..