انتشار ظاهرة توريث التگربيز..لماذا يعرب الأمازيغ أبناءهم ؟

انت أمازيغي و مراتك أمازيغية ولدتو ولد ولا بنت علاش غادي تدويو معاه ب الداريجة !

هذ الظاهرة منتاشرة بزاف مؤخرًا فلونطوغاج لي عايش فيه "سوس" أكادير خصوصا ، لي تزوج اولد كاتلقاه النهار كولو كايديوي بالشلحة غير كايبغي اتواصل مع ولدو الصغير كايقلبها داريجة ، خصوصا الطبقة ديال الموظفين قل من 6000 درهم و داسيا و بارطمة فالسكن الإقتصادي هذ الطبقة غالبا كايكونوا ولاد الأحياء الشعبية و عائلتهم كايكونوا على قد الحال مدابزين مع الوقت حتى كبروهم و قراوهم غير كايتوظفوا كاتزاد فيهم نغزة كايدفع فبرطمة و كياخد داسيا كريدي ، مهم على حساب الظروف فاش كان عايش كايبغي اشونجي حياتو خصوصا و هو موظف كايحساب له بللي راه ارتقى وحتى من تاشلحيت هي غير لغة ديال الفقراء و مالين الحوانت وبّاه و مّو ، كايكون عندو بالدرجة الأولى دافع نفسي كايخليه احس بواحد النقص وهو كايدوي بتاشلحيت وديما كايعتابر الداريجة ولا الناس الغير الناطقين بتمازيغت اسمى منه وأعلى قيمة داكشي علاش غير كايتزاد عندو شي ولد ولا بنت كايدوي معها بالداريجة زعما باش تكون حتى هي من الطبقة السامية ههه ، كايمشي عند واليديه للدار جدّات الولد كاتبغي تدوي معه بالشلحة اللغة ديالها ولي كاتعرف ليها اصلا وحدها كايقاطعها سي الكربوز و كايقول ليها ؛ uhuy a immi ad ur tsawalt taclhit d "rayan" hati riht aycaTr  .
بحال هذ الكرابز كيساهمو فانقراض اللغة بحيث دبا كاتشوف شحال من واحد خصوصا من هذ الجيل الصاعد ولاد 2006 لفوق كاتسول شي حد كايقول لك كانفهم الشلحة ولكن مكاندويش بيها حيث ماما أو بابا شلوح ولكن انا عربي ، هذشي السبب ديالو هو بحال النموذج لي دوينا عليه سلفا ، خص بنادم اكون عندو واحد الوعي بالهوية و الثقافة و اللغة ديالو و يعرف باللي ولادو هما لي غادي ازرع فيهم هذ 3 د الحوايج .
واحد النقطة اخرى، واش اعباد الله لي مسمي ولدو ب "سيف الاسلام " ماشي خاص لي اكويه ! واش حنا ماعندناش أسماء امازيغية زوينة وعندها معنى حسن من هذ الاسماء المشرقية لي كاتخلع ، راه عطى الله سميات زوينين بالأمازيغية بحال أنير ، تازيري ، أريناس ، أناروز ، أمناي ، أريناس ، ثاشفين... الخ .

الناس لي كايسميو خناثة اسمحو لينا حنا كاتجينا حشومة قريبة ل تَخْنَا-نّْكْ