المحتوى الأمازيغي يصارع للبقاء في ساحة الميديا في ظل ضعف الإقبال

#المحتوى_الأمازيغي_بين_قلة_المشاهدات_و_الرغبة_في_الإستمرارية_و_فرض_الذات .
المحتوى الأمازيغي فالسوشل ميديا قليل بزاف مقارنة مع المحتوى ديال الداريجة  نفس البلان ديال القنوات التلفازية تماما ، قناة وحدة ديال تمازيغت وخصنا نشوفو كي نديروا ندوزو البراميج ديالنا ب ثلاثة السواسة و الريافة و الأطلس... بغض النظر على واش نيت فعلا هذ القناة ديال تمازيغت ولا غير تبثونا بيها ، وكاتلقى عرام ديال قنوات ديال الداريجة ها الأولى الثانية، المغربية و MBC5 ... مع العلم انه هذ القنوات الناطقة بالداريجة عندنا فيهم الحق فواحد نسبة مئوية و خصهم احتارموا دفتر التحملات ويدوزو الأفلام ديال الأمازيغية فهاذ القنوات .
فالمحتوى الناطق بالداريجة على السوشل ميديا  مثلا كاتلقاه متنوع وكثير بزاف ها ديال التاريخ، الفن، الرياضة، الموسيقى، الدين، قصص، فلوكات، البودكاستات... فضلا على المحتوى الثافه لي كايطغى عليهم ، حنا امازيغن المحتوى ديالنا معدود على رؤوس الأصابع و مقارنة مع ديال الداريجة راه مكايبانش واخا مؤخرا ولاّو الشباب كايهتموا بهاذ المحتوى وكايديروا فيديوهات  ممتعة و هادفة سواء مايتعلق بالتاريخ و الهوية ديال امازيغن ولا الفلوكات... وكايعبروا على الاحترافية ديالهم فالمونطاج و الديزاين و التصوير وكايتقاتلوا باش افرضوا راسهم بين تسونامي الناطق بالداريجة ، لكن سرعان ما كايفشلوا ملّي كايلقاو عدد المشاهدات و المتابعين قلال بزّاف و الفيديو فيه مادة معرفية ومخدوم باحترافية وضارب عليه تمارة فالمقابل كايلقى المحتوى ديال الداريجة خصوصا الثافه ضارب 4M وغير تخربيق شي مقالب مفروشة شي تحديات لا علاقة. انت كأمازيغي ماقلناش لك ملتفرجش فالمحتوى ديال الداريجة ولكن ماتنساش المحتوى الأمازيغي حتى هو حشوما كاع تلقى فيديو زوين مخدوم مزيان ومافايتش 30 الف ولا قل كاع !
هذشي لي كايخلي الأغلبية ديال صناع المحتوى الأمازيغ ابدلو للداريجة ويضمنوا جمهور كثير من الناطقين بالداريجة و حتى من الأمازيغ ، و السؤال المطروح هنا علاش غادي تخلي واحد صانع محتوى زوين بالأمازيغية وغادي تمشي تفرج فنيبا ولا فساريكول ؟  واش داكشي كيما كانقول ديما مرتابط بما هو نفسي كاتحس بللي هما حسن منك ونت قل منهم وخسك تولي بحالهم ؟ ولا مطرب الحي لا يطرب ؟!

من صناع المحتوى لي متبعهم أنا شخصيا كاين  الدّاموح-Damouh المحتوى ديالو زوين كايخلط بين الفلسفة و الدين و أحواش داكشي عندوا مقبول واخا كانختالف معه فشي حوايج بساط...يالله واصل 10 الف مشترك ، كاينة El guerch ghizlane كاتدير فيديوات على شكل فلوكات يالله واصلة تسعلاف مشترك ، كاينة تَاسُوقّيتْ حتى هي كاتدير فلوكات و فيديوات على شخصيات تاريخية وماعندها حتى  الف مشترك! ، كاين Habib Salam حتى هو كان كان كايدير الفلوكات بالداريجة ورجع كايديرهم بالأمازيغية و كايدير حتى محتوى موسيقي وليكوفر ديال الأغاني القدام ديال الروايس والله عندو 100الف مشترك ، وكاين Mouad id baha هو الدري لي فالصورة المرفقة بالمنشور هو لي كالس الوسط ، هذ الدري حتى هو كان بدا كايدير فلوكات بالداريجة ملي نضج عندو الوعي باللغة و اللهوية ديالو قلبها بالأمازيغية ، وكايدير حتى بودكاست مسميه " NJM3 PODCAST " داكشي عندو نقي و احترافي، ستاضف فيه شحال من صانع محتوى بحال إكيدر و جوبا نتوجا و ابراهيم لاتينو و خالد الضالا و خديجة امهال، الداموح .... تقريبا حتى هو توقف من اكتوبر لي فات مالاحش شي حلقة ديال البودكاست ولكن على ما اعتقد فالقريب غادي الوح حلقة جديدة  وحتى هو يالله وصل 31 الف مشترك ، كاين كذالك iguidr كايدير الراب بتمازيغت عندو مايعطي عندو 83 الف مشترك ونتا كاتسنط ليا لطوطو ، كاين كذالك Jubantouja كايدير محتوى موسيقي كايغني بالأمازيغية ويمزجها بموسيقى الروك وحتى هو يالله عندو 15 الف مشترك .
السوشل ميديا كنمثلها بحال شي مارشي ها لي كايدير محتوى بالداريجة ها لي دايرو بالعربية ها لي دايرو بالفرونسي ها لي دايرو بالانجليزية ، المحتوى الأمازيغي خصنا نشجعوه باش نلقاوه بكثرة فهاذ المارشي حيث ماشي معقول بنادم ضارب تمارة باش افرض ذاتو بين المحتوى الناطق بالداريجة ونتا لي موجه لك هذ المحتوى كاع مامسوق و مقابل مي نعيمة .