هل المال الدافع الأساس لهجرة المغاربة إلى أمريكا ؟

بزاف ديال الخوت دخلو سولوني على القرعة الامريكية وأغلب الاسئلة تتكون من قبيل :"أنا أستاذ تانتخلص عشرالاف درهم وجاتني القرعة واش نمشي ولالا؟"، أو "أنا خدام فشركة هادي ربع سنين وسيليباطير وتانتخلص ربعالاف درهم واش الى مشيت لميريكان غادي نزطط؟"، أو "أنا كاندير التجارة الالكترونية والمدخول ديالي ما بين 3000 و 8000 درهم فالشهر على حساب المبيعات، واش نمشي ولا نكلس"…

طبعا كل واحد حر فحياتو وفالقرارات ديالو، لكن مادام كايجي الانسان ويسولك ويطلب رأيك، فالجواب هو أن أي واحد تايسول على الهجرة باش يحسن غير الظروف المادية فهذا أكبر خطأ يقدر يطيح فيه، لان الهجرة كاتعني أنك خارج من ثقافة وغادي لثقافة اخرى، صحيح أننا كلنا محزوقين وباغيين نديرو لاباس ولكن اللي مكايفكرش فالستايل ديال الحياة هو الاول راه مايمكنش يدير لاباس..

كاينين بزاف ديال المغاربة فالمهجر تاتلقاهوم من الثمانيينات مثلا وهوما خدامين نفس الخدمة مثلا شيفور ديال الطاكسي ولا خدام فريسطو ماباغي لا يجتاهد والا يطور راسو ولا يدير شي ثورة فحياتو من أجل تغيير داك الستيل ديال المعيشة اللي كان مولف فالمغرب..داكشي لاش ديك الجينيراسيون تتقوليك "الخاريج مابقى فيه مايدار"، حتى الشباب ديال اليوم كاينة واحد الفئة اللي تتقول نفس الشيء، ونسبة مهمة من ديك الفئة ماقدراتش تطور راسها وتنصاهر لأن الجسد ديالها كايعيش فالغرب  ولكن الروح والعقل باقيين فالبلاد الام، ماشي تنقول انه خاصو ينسا بلادو وانما خاصو ينصاهر ويعرف يستاغل الفرص مادام هو فبلاد ديال الفرص..

اللي خاصك تسول عليه ملخر، ماشي الصالير، وانما le style de vie، واش نتا مرتاح فأنه اذا تفركعات البوطة فالدار خاصك تتسنا البومبية ساعة ولا جوج عاد يجيو يعني حتى يموت اللي يموت؟ اذا مرتاح كلس فالمغرب واذا بغيتي الاسعاف يجي فدقيقة ونص سير لبلاد المهجر اخويا… واش مرتاح اذا ولادك تم التحرش بهم ولا تضربهوم كصيدة قدام المدرسة ولا يتم اختطافهم؟ اذا كنتي مرتاح كلس فدارك ماعندك مادير بشي ميريكان، واذا بغيتي ولادك يكونو في أمان ويكونو على رقبة الدولة وفي حمايتها ورعايتها حتى يوصلو سن الرشد سير لميريكان..

واش بغيتي تمشي فنص الليل ونتا مخلوع ويتلقاو ليك الشفارة يشرطو ليك حناكك ويكريسيوك ؟ مرتاح؟ ماشي مشكل كلس فالمغرب… ممرتاحش سير للبلاد اللي ماكاينش اللي يدوي معاك فيها واخا تمشي عريان فالزنقة هوما غايشوفوك غايهربو منك ههه..
واش مرتاح مراتك تمشي لقسم الولادة وتلقاه عامر وتبقى كتتوجع وتغوت فالكولوار حتى تولد وسط الدمايات والوسخ ؟ مرتاح ماعندكش مشكل؟ هانية كلس تما… ماعاجبكش الحال؟ سير اخويا للبلاد اللي فيها قطاع الصحة كايحتارم آدمية الانسان وكايعطي قيمة للمرأة الحامل وكايتهلا فيها حتى تولد ويتهلا فالطفل بالمراقبة الصحية والمتابعة الطبية حتى يكبر ..

الخلاصة ماعمرك تسول شيواحد على الصالير واش يكفي ولا مايكفيش لأنك ماغاديش تموت بالجوع، ولأن ديك عشرالاف درهم للشهر تقدر تجيبها فسيمانة فالمغرب وتقدر تجيبها فنهار ولا فساعة وحدة كاع… ولكن راحة البال والحياة السعيدة ونمط العيش صعيب تلقاهوم.. والله يوفق الجميع