عبد الرحيم الوالي معلقا على رفض الفنان المغربي محمد مفتاح لمشروع الزواج

فينما دخلت لفيسبوك كيطلع لي هاذ خينا وهاذ الكلام اللي منسوب ليه.
ما عرفتش واش گالو بالصح ولا لا. ولكن لنفرض أنه فعلا گال هاذ الهدرة فهذا شغلو، كيهمو بوحدو، يتزوج ولا ما يتزوجش ذاك الشي شغلو. ولكن ذيك اللعبة ديال "أنا متزوج من التمثيل" غير هدرة وكلام لأن ممثلين عالميين وممثلات عالميات مزوجين وعندهم أسر ديالهم وناجحين فالحياة الأسرية ديالهم. وهذا كيدحض تماما هاذ الهدرة ديال "الزواج فاشل لا معنى له". الزواج بحالو بحال أي مؤسسة اجتماعية كاين ناس كيندمجوا فيها وكاين ناس ما كيندمجوش. وباش الإنسان يسمح لنفسو يلغي عاطفة إنسانية على قدها ويگول أن الحب ما كاينش هذا فيه بزاف ديال المجازفة. إيلا ما كاينش بالنسبة ليك هذاك حتى هو شغلك. ولكن بالنسبة لناس آخرين كاين. أما المال فهو مجرد حاجة (Un besoin) وماشي موضوع حب بالمعنى العاطفي. وإيلا ولى الإنسان عندو علاقة عاطفية مع الفلوس راه خاصو يبالي براسو قبل ما يفوت فيه الفوت ويشوف ليه شي علاج نفسي فعال.
أخيرا، العلاقة مع الأم مهما كانت ما يمكنش تعوض العلاقة مع الزوجة أو مع امرأة اللي فمقام الزوجة. وإيلا ولى الرجل عندو التماهي بين الأم والشريكة الجنسية فهذا عندو دلالة خايبة قياس الخير لأن معناه أن عقدة أوديب عندو فايتة القياس.
وباش نختموا ما فيها باس نذكروا بأن التمثيل راه مجرد مهنة بحال سائر المهن والممثل الناجح بحالو بحال الفرملي الناجح، والخراز الناجح، والسمسار الناجح، والشفناج الناجح...إلخ. هذا علماً أن شحال من خراز مثقف أحسن من شحال من ممثل مشهور. وشوكغان.