دور المؤثرات والمجموعات النسائية في تخريب الأسر
أكبر نسبة كتسول ديما على كيفاش تتصرف في مواقف حصلات ليها مع شريك حياتها أو عائلة زوجها هما النساء وأغلب لي كي عطيوا النصائح في هاد الباب حتى هما كذلك نساء رغم أنه ممكن نجزم ليك أن أكثر من 90٪ من هاد نساء لي كي عطيوا نصائح حول المشاكل الزوجية غير مؤهلين وأغلبية النصائح كي كون التأثير ديالها سلبي كثر ما هو إجابي.
شحال من مرة صادفت رجال كي عطيوا نصائح للرجال على كيفاش تعاملوا في مواقف معينة في الزواج كتلقاها أكثر عقلانية ومنطقية وكي كون الهدف ديالها بناء باش تستمر العلاقة لكن أغلب "المرشدات" ديال الأنستغرام راهم كي عطيوا نصائح ديال تفرتيك لعشوشة بلاما نهضروا على داك العدد المهول من المجموعات الفيسبوكية ديال النساء لي نهار كامل كي نصحوا في بعضياتهم بالخوا الخاوي واختي ديري ليه وديري ليه ولهلا يحييه حتى نخليه يفعليا ويترك ليا ... راه غادية وكتقواد وصعيب على جوج ناس يتكلفوا بأطفال وهما مفارقين واي واحد تفرق وعندهم وليدات راه مستحيل يعاود يفكر يتزوج واخا يكون مزال شباب وخاصة الدراري لأنه كتولي عندهم مسؤوليات كثيرة وعندهم مدخول شهري ضعيف جدا.
كتلقى ناس دوزوا عشرين عام من زواج ومع ذلك مزال كي وحلوا في كيفاش تعاملوا في شي مواقف زوجية وتلقى وحدة تزوجات غير لبارح ونهار كامل دايرة ليفات تنصح لبنات كيفاش يعاملوا ازواجهم كدوز عامين زواج ولا أقل كتلقاها هي تفرقات مع زوجها.
الحياة الزوجية راه ماشي بديك السهولة لي كتخيلوها راه تجربة لي كي خاص الانسان يقدم فيها بزااف التنازلات وخاصوا بزااف الصبر وخاصوا بزاااف المسؤولية فاش كي تزادو لولاد وخاصك تربيهم وتتكلف بيهم وتهز مسؤوليتهم الكاملة.
نتي أختي إلا عندك مشاكل مع شريك حياتك حاولي تستاشري ناس لي باغين ليك الخير بحال الأب أو الأم أو الجد أو الأخ.
المشاكل لي كتعلق بحياتنا الشخصية ولي ممكن تكون مصيرية بين الشريكين خاص ناخذوها بالجدية اللازمة ونبعدو مؤثرات ديال السوشل ميديا لأنهم ماشي ناس مؤهلين باش يعطونا النصائح راه كاين ناس مختصين في هاد شي لي ممكن الواحد يستاشر معاهم عند الضرورة.
ما هو رد فعلك؟
