المغاربة و حنينهم للزمن الماضي : نور مزيف يُضيئُ ظلامَ حاضرهم
شي حد برطاجا شي صورة متعلقة بمسلسل تركي كيرجع لسنة ألفين وطناعش ،أنا ماكنتش كنتفرج فيه مع الأسف،حيث داك ألفين وطناعش بضبط كنت مزال محبوس فمدرسة عتيقة شاد اللوحة ديالي كنحفظ فيها منظومة ألفية ابن مالك ..المهم دخلت للتعاليق لقيت كولشي كاتب ، آه ليام زينة ...
معرفتش علاش بنادم مزال مابغاش يعيق بالقالب بلي أي زمن مشا راه كيولي من بعد ( زمن جميل ف نظرك وفي نظر الناس ) وخا دوز عليه غير سنوات قليلة، عرفتي دبا زمن كورونا وخا هو أسوء الأزمنة فهاد العقد، راه من بعد سنوات غيولي زمن جميل في نظر الفاشلين..
لذلك حاول ما أمكن تركز على زمنك وحقق فيه الإنجاز وفرح فيه وعيش كل لحظة كأنها النهاية وقرا وثقف وتعلم شي حاجة وصقل شي موهبة يلا عندك وخلي حاضرك غني، عوض تعفط على كل لحظات زمانك وتسنى ديما الأجمل ينزل عليك من السماء حتى يجي واحد الزمن وتبكي على الأطلال ، وحتى تولي العادة ديالك فحياتك كلها البكاء على الأطلال، بحال دوك الشارفين للي كتلقاهم كيكذبو عليك فشي قنت، كان زمن ديالنا فيه البركة والحشمة وكانو الناس بيخير وعلى خير ، وخا هو الجيل ديالو دوز أكفس العصور في تاريخ المغرب ...
معرفتيش علاش بنادم كايحن للأيام الماضية ؟
حيث كايشوفها هي الأيام الوحيدة ديالو لي زوينة، حيث ديما الحاضر ديالو كفس وكفس ، ملي كيكون الحاضر ديالك مميز واعر وغني صعيب اصلا تفكر فالماضي ولا تسوق ليه ..راه هدشي ماشي غير بالنسبة للأفراد ، راه حتى بالنسبة للشعوب والأمم ، الأمة للي عندها حاضر عظيم مكيهمهاش الماضي ديالها ومكتعطيهش ديك الهالة الكبيرة ، بينما الشعوب لي عندها حاضر بئيس ، ديما كاتبقشش فالتاريخ والماضي وتقلب فيه على شي بصيص من النور باش تضوي بيه فظلام الحاضر ديالها .. وكتلقاه كيقولك كان أجدادنا العرب في دمشق ...وكان هارون الرشيد في بغداد ...وكان الأروبيون يتعلمون العربية لأن العرب كانو أهل حضارة... كان وكان وكان .. بكل بساطة صافي كاتكون مجرد أمة كان وكان .. الاروبيين البارح لي كانو كيتعلمو العربية بش يستفدو من الثراث ديال العرب تعلموها وستفدو وطورو وزادو وفاااتوا ...ايوا قدس نتا العباسيين والمرابطين ...
بحال واحد السيد كان جدو كان سلطان أو أمغار بالامازيغية مشات الايام وللى هو إنسان بسيط بحال كاع الناس ،وعوض يمشي يحقق ذاتو مشا كيقول للناس كان جدي سلطانا ، أنا ابن ابن السلطان ... مسكييييين
ما هو رد فعلك؟
