لماذا نحب الأطعمة الحلوة و السكريات ؟
وحدة من الأسباب علاش كنبغيو ناكلو السكر و الحلاوة .. هو أن فالعصر الحجري كان المذاق ديال الحلاوة فالماكلة بالنسبة للهوموسابيان لي هوما حنا .. كيعني أن داك الماكلة، النبتة، الثمرة، الفاكهة، الخضرة .. هي ماكلة غير مسمومة .. و القاعدة هي أنه ماكاين تاشي ماكلة فالطبيعة حلوة وفنفس مسمومة .. و السبب الآخر أنه الحاجة الحلوّة مليئة بالطاقة .. وفالوقت كذلك لي كان صعيب على الانسان يلقى الماكلة فالغابات و الصافانا .. كان خصك غي تطيح على شي مصدر ديال الحلاوة بحال شي شجرة ديال التوت مثلا تهبط عليها كاملة و تخبّع فكرشك ما أمكنك ديال الطاقة قبل ما يجي شي حد موراك ويلقا الشجرة تا هو ..
هادشي اليوم أكيد تبدّل .. ولكن للأسف حنا عندنا الجينات ديال جدودنا .. و الجسد ديالنا مازال ماعارفش أنه الماكلة موجوودة وقتما بغينا .. يكفي تحل الثلاجة وتجبد شي حلوة تاكلها .. ولكن للأسف الجسد ديالنا مازال تا هو بدائي و كيتعامل مع الامور تماما بحال الانسان البدائي .. الدماغ ديالنا غي كيشوف شي حاجا حلوّة كيتشهاها وكياكل منها حتى كيتگهم .. أولا حيت ديك الحلاوة كتعني مصدر طاقة للجسد ديالنا وثانيا حيت الماكلة الحلوة كتفرز لينا الدوبامين لي كيخلينا نحسو بالسعادة .. تماما مثل تصفح السوشل ميديا، العاب الفيديو، الجنس، الممنوعات، .. الخ .. وبما أن الأكل أسهل حاجا في عصرنا، كنمشيو ليه هو اللول من أجل الحصول على المتعة و افراز الدوبامين .. وحيت حنا ماشي بحال الانسان البدائي جالسين النهار كامل فبلاصتنا و مكنتمشّاوش طوال النهار وسط الغابات .. داك السكر، النشويات كاملة لي كناكلوها مكنحرقوهاش، دكشي كيتخبع على شكل دهون نهار مور نهار ..
ما هو رد فعلك؟
