تفاهة السوشل ميديا بالمغرب و الصراعات بين أصحاب القنوات
هاد السوشل ميديا وصلات لواحد المستوى ديال انك تقدر تبقى فيها لمدة يوم كامل بلا ماتستافد حتى لعبة، حتى معلومة أو خبر أو إفادة او عِلم ماكتزيدها لدماغك.. دابا رجع اللامنطق هو الطاغي فالساحة، وفالمغرب بالخصوص أي واحد داير قناة كيفما بغا يكون نوع المحتوى ديالها ماعمر المغربي مكايفرح لخوه المغربي أنه يدير لاباس، ولينا كانتفرجو فروتيني اليومي ونطنزو على مولاه ونتفرجو فمول العيلم ونطنزو على مولاه واخا كاع يكون شيواحد محايد كايغني خارج السرب كانقلبو ليه على السبة وكانتسناوه فالدورة ونبقاو شادين الكالكيلاتريس ونحسبو شحال يكون كايدخل، تماما بحال ملي كادخل لعيادة ديال شي طبيب وكاتشوف شحال ديال الناس كايتسناو وكاضرب العدد ف 300 درهم…
فعلا مكاينش المنطق بتاتااا، أي واحد بانت كمارتو ففيديو هو عُرضة يطلع فالعمارية وندوزو بيه سيمانة ديالو بيدما تبان شي فاجعة ولا شي حدث جديد ولا شي واحد يزلق زلقة لا تغتفر وهكذا…
كانمجدوا ناس اللي ماكيعطيو حتى قيمة مضافة وحتى اذا كانوا كايعطيو ديك القيمة المضافة فراه والله مانعقلوا عليه واخا يكون تبرع بالكلاوي والرية ليمنية ديالو وعينيه…
ماشي عيب تكون عندنا التفاهة، لان حتى البلدان المتقدمة عندهوم نفس الشيء ولكن تفاهة بمنطق الترفيه، كاتعطي للمشاهد منتوج بمانريال ماضي وجودة عالية وفريق عمل احترافي وأفكار تافهة لكنها لا تخطر على بال والتافهين ديالهوم كايساهموا بشكل أو بآخر باش يفوجو على بنادم بطرق مبتكرة وحتى المشاهد كايعرف ايمتا يتفرج وايمتا يحبس ومنظم وقتو ووقت ولادو وكايدخل يشوف فقط فالوقت الثالث أو الرابع ديالو لأن هناك أمور أخرى أهم من هادشي فالحياة…
غادي تقول ليا وا باراكا من الجدية وطلقها تسرح، ايه متافق معاك، راني غير داوي وهادشي ماغادي يفيد بحتى حاجة ولكن فاش كاتمشي للانستغرام مثلا كاتلقى بنت ساكنة عين عودة والواليد ديالها غادي جاي كايهز البلايص بالتريبورتور وعندها خمسمية ألف واحد متابعينها حيت مصاصطها والنص فصدرها باين والفيلتر والتصاور فمارينا ديال سلا فالقهوة ديال أبو زعيتر، فاش كاتشوف هاد اللامنطق كاتقول رحمة الله على نوكيا بيلا و ألكاطيل فراكة…
ما هو رد فعلك؟
